Cegerxwîn

GULA ROJHILAT IM

Gula baxê bihişta rojhilat im.
Di tarîya şevê roj im hilatim.
Ji nav singa demê pişkîme îro,
Di tarîxê fireh hatim, Feratim.
Hemî jînim, dixwazim xweş vejînim,
Hezar û nehsedî şîn bûme katim.
Birûskim, pir çirûsk û hewr û tavan
Bi himhim têm, ji ezmanê welatim,
Lehîme ez di ser hev re diborim.
Dixwazim nû bikim rêz û civatim.
Birûsk û pêt û ar kevne sojim,
Ji pût û lat û lahût re şewatim.
Disojim lê dikim ronî şeva reş
Çira kora ye ev kar û xebatin,
Di vê rê de ez dicim lê seg diqorin.
Fidakarim li ser rêça felatim.
Dixwazim ez di ser hev re bifûrim,
Xebatim, şorişim, xweş kêferatim.
Cîhan tev de wekî pingav û derya
Tenê jê re wekî cok û qenatim.
Bi daxwazim ko serbestî dixwazim serbilindî.
Ji milet re di vê şabatê hatim.

(Cigerxwîn, Dîwana Sêyemîn, Kîme Ez 1973)