Piştî bûyera Efrînê: 
 Lîsteyek bi navê 9 kurdên ku divê bên kuştin amade bû
 

Efrîn- rojava.net: Hin jêderên pêbawer li Efrînê ragehandin ku endamê Perlemana Sûrî yê ereb Diyab El Maşî destûr daye êla Bobina ku 9 kurdên bi kuştina 2 endamên vê êlê têne tawanbar kirin, bikujin. El Maşî bi xwe jî ji Bobina ye û bi nijadperestiya xwe li dijî kurdan naskiriye.

Jêderên herêmê dibêjin ev lîste bi zanebûna desthilatdarên Sûryê hatiye amadekirin. Li gorî van jêderan eger êla Bobina van kurdan bikuje, ewê ji hêla desthilatdarên Sûryê ve neyê cizakirin.

Navê her 9 kurdên di lîsteyê de ev in:

-         Yûsif Elî Qero

-         Necîb Elî Qero

-         Ferhad Elî Kêfo

-         Heysem Elî Kêfo

-         Mihemed Henîf Arif Seîd

-         Elî Bekir Caf

-         Elaa Ebdo Bekir

-         Seîd Bekir Mihemed

-         Ebdilqadir Umer Qoso

Di 20.04.2005 de erebên êla Bobina êrîşî hin malbatên kurd kiribûn û dicûn ji kesayetiyên kurd re dabûn. Di encama vê yekê de wan û kurdan li hev dabûn, 2 ereb hatin kuştin, 1 kurd brîndar bû û piştre mir û di pey re bobinya 3 malên kurdan şewitandin.

Desthilatdarên Sûryê êrîşkarên ereb ciza nekir, berevajî wê dest bi girtina kurdan kir. Ji egera vê yekê hejmarek ji kurdên herêmê (20-30 kesî) xwe di Çiyayên Kurmênc de veşartin.

Piştî rûxandina rêcîma Seddam Hisên nijadperestiya erebî li dijî kurdan pir bi hêz bûye û ta radeyekê weke tevgereke erebî ya gelêrî li dij kurdan hatiye afirandin. Ev yek ji hêla desthilatdariya Sûryê ve bi zanebûn tê bikaranîn, da pirsa kurdî ji wateya wê ya netewî-siyasî dûr bixe.

HEVGIRTINA REWŞENBÎRÊN KURDÊN ROJAVA LI DERVE