Rêveberên hêja yên kongireya sêyemîn a hevgirtina rewşenbîrên kurdên rojava li derve..

Silav û rêz ..
Di ev dema dijwar û wêran de, di ev dema kujeran de, hûn xebatek balkêş û ber bi çav bi rêve dibin, ew jî bê goman cihê rêzgirtin û şanaziyê ye, û hêjayî piştgiriya me ji ked û çalakiyên we re ye.
Di vê boneyê de ûmîdewarim ku hewildanên we bigihên armancên xwe yên watedar, û hêdî.. hêdî dîwarên çanda tirsê li welêt biherifînin, da em jî bigihên pariyek roj û xewnên berfireh.
Bê goman roleke rewşenbîran ya payebilind di kêmkirina xirabiya ku li cîhanê de heye, da ku jiyîna me di nava ev toza totelîter de hinekî pêkan be û nêzî asoyên rastiyê be. Di vê derbarê de, û ji ber nebûna çarçoveyeke wek hevgirtina we li welêt, em ên li welêt hêvî dikin ku hevgirtina we di demên pêş de bandorker be, û hewil bide ku li welêt jî rolekê bilîze. Bê goman têkiliyên me bi hevgirtinê re tenê bi rêya malperê ye, û kovara we urkêş nagihê rojavayî kurdistanê, lewre em hêvî dikin ku pire yên we bi rewşenbîrên ku li welêt dimînin re xurtir bibin.
Herweha ez pêşniyar dikim ku hûn di demên pêş de, li gor derfetên xwe hewil bidin da weşanxwneyekê ji nûserên kurd ên rojavayê welêt re saz bikin, çu ku wek hûn dizanin li welêt di weşangerî û çapkirina pirtîkan bi zimanê kurdî qedexeye, û divê bo çap kirina bi kurdî destûra lêderiya sûriyê ya baas hebe, an herî kêm hûn quncikekî di malpera xwe de ji bo e-pirtûkan ava bikin, ev jî di nerîna min de pêwîst e, ji ber ku em her ji xelkê xwe fêrbûna zimanê zikmakî dixwazin, lê dema yek hînî zimanê xwe dibe jî berhemên bi kurdî tune ne ku bihêlin ew di zimanê xwe de berdewam bibe.
Xelek û korsên zimên tenê ne besin, divê berhem jî hebin ta tîbûna kurdîhezan bişikîne, ji ber nebûna berhemên bi kurdî em hemû berê xwe didin zimanên din.
e- pirtûk ji rewşa me ya aloz re çareseriyeke, ji ber ku navendên çanda kurdî îroj li derve ne ( tenê di dema hawarê de, heya astekê rojavayê kurdistanê navend bû ), li bakurê kurdistanê ne, li diasporayê ne, û dewleta me ya polîsî nahêle ku pirtûk bi hêsanî derbasî hundir bibin, wek mînak di heyva sermawezê de, dema ku ez ji rojên wêje, ji amedê vegeriyam nêzî 40 pirtûkên min hatin girtin û hêjî venegerandine.
Belvkirina e-pirtûkan di malperê de fedekariyê ji aferînerên kurd dixwaze, çi problem heye dema ew pirtûkên xwe bi awayê PDF ji malperê re bişînin, malper jî biweşîne. Pirî caran birêz Ibrahîm Seydo Aydogan behsa bi dehan romanên kurdî dike, lê me çend roman ji wan xwendine.
Pêşniyara min ya dawî jî eve: ji bo lîstina ew rola bandorker a min li jorê destnîşankiriye, divê hevgirtin di hin waran de, hin komîteyan ava bike.

Serkeftinê ji kongireya we re lava dikim..
Her hebin..
Spas

Helbestvan û nûser : Mustefa Îsmaîl
Kobanê – rojavayê Kurdistanê