Erebo bi papîrê xwe re li pîkapekê siwar bû, deh saetan bi rê de man ta ku gihîştin devereke dûr, li wir Erebo yê kal bi alî gundekî biçûk de, destê xwe dirêj kir û got: ev Yafa ye.

Erebo yê biçûk ji kêfa re matmayî ma û got: ma qey em li Felestînê ne, dapîrê min?

Bi serbilindî, Erebo yê kal got: belê.

Erebo yê biçûk, bi dilpakiyekê pirsî: Ka zeviyên pirteqalan li ku ne bapîrê min?

Kalê bersiv da: Devê xwe bigre. Û berê xwe dan gundan da ku bigerin, lê Erebo yê biçûk difikirî û ji xwe re  texmîn dikir ku bêguman dijminê sionîst, yê ketxwar, zeviyên pirteqalan şewitandine.

Erebo yê biçûk nîşanek dît, (Heyfa xêrhatina we dike), li ser hatiye nivîsandin, xwend û ji kalkê xwe re got: Em gihîştin Heyfa. Enîhilmiştî û bi dilxweşî bapîr keniya û got: Belê ev e Heyfa, ka em hinekî peya bibin û ji xwe re lê meyzînin... û daketin.

Erebo yê biçûk heyirî ma bû, û ji bapîrê xwe pirs kir: Lê, ka ez deryayê nabînim bapîrê min!!? Erebo yê mezin bînteng bû, şiqamek li Erebo yê biçûk xist û gotina xwe ya her tim jê re got: devê xwe bigre.

Gera xwe berdewam kirin, ta ku Erebo yê biçûk nîşanek dît (Elqudis xêrhatina we dike), li ser hatiye nivîsandin, hinekî dengê xwe bilind kir û bi şahî ji kalkê xwe xwest ku hinekî peya bibin û li Qudisê binerin, bapîr bi neviyê xwe dilxweş bû, ji pîkapê peya bûn, vê carê ecêbmayî û bi tirs, Erebo yê biçûk ji kalkê xwe pirsî: Ka mizgefta El Eqsa? Bapîr lêxist, Erebo ket erdê, bapîr bi pihîn û şiqaman bi ser gewdê Erebo yê biçûk ket û bi qîreqîr digot: Qudis ev e , ker lawê keran. Erebo yê biçûk di bin pihîn û lêxistinê de hinekî cegerdar bû û qîriya: Tu derewan dikê, na xwe kanî xaçxaneya jînvehatinê pêş min bike, ka dîwarê El Buraq?

Bi hêrstir bapîr erîşî Erebo kir û bêtir lêxist: Hey kûçik ev Qudis e, ji ber ku te kitêbeke ceyografiya xwendiye, tê xwe li ser serê min bikî fîlosof û zimanê xwe dirêj bikî??

Erebo yê biçûk qebûl nekir hilkişe pîkapê, bapîrê wî ew xuşand, bi rûnişkirin da, û bi dînbûnekê ajot, Erebo yê biçûk digriya û xwîna ji canê wî diherikî paqij dikir, wê çaxê nîşanek li pê nîşanekê dîtin:

(Xeza xêrhatina we dike), (bikene, tu li Ramella yê), paşê (Nablus xêrhatina we dike) û (hûn bi xêr hatin El Lid), û (Cînîn ya berxwedanê xêrhatina we dike)….ta ku nîşana dawî: (bajarê El Hesekê serdana we spas dike) xwend û di xew ve çû.