MELKEMOTÊ KÛLÊ

  SALIHÊ KEVIRBIRÎ

 Diyarî ji bo ‘pênûsxweş’ê çanda kurdewarî Kakşar Oremar...

 

Gava te terka min da

‘Melkemotê Kûlê’ hate serdana min

Gava te dilê xwe ji min da alî

‘Kûpê Xwînê’ fermana min rakir

Li bin siya dara hejîrê

Daçikand sêdara min

 Badilhewa negotine pêşiyên me:

‘Mêrikê xerîb kor e, siûda kuştiyan tuneye!’

Îro xerîb im, siûd xwe ji min daye alî

Lew hem kor im hem jî kuştî

 Gelo heye ku tu rojekê vegerî?

Heye ku awirên ‘fêlbaz’ û ‘çavnebar’

Dîsa ‘nezerên sotîner’ pêşkêş bikin

Min qayîl e heyran!

Bes vegere

 Roja ku tu hatî bi xêr

Bi bişirîna xwe yê zirav

Ku di wê bişirînê de

Awazên Dengbêjan Xerzan veşarî ne

Êdî ‘Qasidên Zilmê’ jî bên ne xem e

‘Pênç pere’ bi ‘qûna’ wan nadim!

Bo sedema ku tu hatî

 Tebax 2004 Stenbol

 

QAŞALMASÊ

 SALIHÊ KEVIRBIRÎ

 Roja ez mirim

Min ‘terqîn’ û ‘yasîn’ navê!

Xwediyê ‘ta û derziyê’

Ku kefenê min didirû

‘Li ser tenaşo yê;

li ber şûştinê!’

Bes bila navê te bibêje

Di guhên min de:

‘Qaşalmasê!’

 

‘Melekên Mewtê’

‘Qasidên Xwedê’

Bila xêzek li ser navê min bixin

Gava bibim xerîbanê

Şana li gerdenê

 

Qisedana goyendeyan e:

Xal û xetên sing û berê te

Kaza Zerê

Qaşalmasê

Gustîlzerê

Navê ‘Allah û Ekber’ li serê!

 Payîz 2004 Stenbol

 

VEGERE