| |
Dildarê Aştî
Bi çi gulê,
Pîroz bikim cejnza te.
Bi çi dilî,
Himbêz bikim bejna te.
Îro xanim,
Tu bûka newrozê yî.....
Li dor te kêferate,
Şîhîniya dozê ye...
Birîna min bişkiviye,
Derxikên te dane der,
Îro xanim sera ser,
Xêlê bi halan û qîrîn,
Tiştê ji hawîr di firin,
Ne çivîkin,
Pîj û gule û tîrin.
Îroxanim,
Tu bûka newrozê ye.
Li dor te kêferate
Şîhîniya dozê ye...
Ji bûkên şewata rêweng
Ber bi baxên dozê de
Tenê mabû
Te jî hûçkên xwe bi xwînê rengîn kirin
Kirine al.
Xeftanê te li ba dibe
Bi kanî û sira ba re dibî heval
Û li nav bexçê êşa min
Bi gerze û goşiyan re
Xweşxewanan xwe dikşîne
Hawe delal....
Ha wer dela...l...
Evîndar bûm ji mêjve
Ji dema ku xunceyan
Sirûda baranê xwendin
Ji dema ku şebnemê
Rondika min
Li ser dêma te jibîrkir
Û hîna tu piçûk bû
Hîna nû peyv
Li dor te di bişkivîn
Û nû henge
Li kulîlkên arezûyê di hingivîn
Min di xwest
Li bin dara şenge biyê
Li şêjina te rûnim
Raserî kanya miradan
Birînên xwe vepûnim
Ji bêhna pûng û rîhanê
Helbestekê bi hûnim
Lê min di got
Belkî tenê arezû....
Hîna zûye...
Hîna raman têz nebûne
Tilî bihêz nebûne...
Û wisa di gelcê de
Min bêdengî di bijart
Di nav di ruşmên kedî de
Mebseta xwe diveşart
Heta ku qêrîna te hiçenandim
Li zaxor û navbiran di gerandim
Gund û bajarokên min
Li serxet û binxetan raprandin
Bend û sînor di bûrandin
Bi halanî
Navê te di hecandin
Qamişlo te çi dîtî.....?!
Te çi bîna.... ?!
Ev toza ji wê ve tê
Ne pezê koçeraye hatiye çêrê
Ne kerwanê peyê ber pirsiyaraye
Girtiye rê
Ne refên qijakane
Danîne li wê derê
Belkî
Cemawerê navtêdana tîmên werzeşiyêne
Lê ji dirv û simbolên wan xuyane
Biyanin...
Ne mizgîna xweşiyê ne
Belkî...
Bazirganên xwînê ne
Belkî...
Zayîndê kerd û kînê ne
Lewra...
Bi min re nayên dîlanê
Li ber saza vê stiranê
Dêrazorê piçûke
Hine l,dest û neynûkê
Par keç,bû îsal bûkê
Lêlê....lêlê....
Ling li celdan di hejin
Û celde ditertilin
Şax û bejin di xiln
Dest pir dibin
Û dêm têne guhertin
Zigurdan di hilçenîn
Di bezin...
Dînemêr xwe çeng dikin
Ziman bi qozik û gezin
Di bezin
Endîşeyan di revînin
Arîşenan di vejînin
Ji kişwara bobelatê
Derketine kêferate
Xem û xewnên xwe dêrane
Kevirê ber dil hêrane
Qamişlo te çi dîtî....?!
Te çi bîna....?!
Li alîkî...
Li berpalan...
Top û teng amadene
Li alyê dî
Li gastînan...
Şilfên kêrên sêwlekan
Li tîrêjên roka sibê di çirisin
Terîş û al
Silogan û lîlandina zeriyan
Û pizrûkên xwêdana ku bûne xunav
Sîwanek ji qozeqerê vedigrin
Di ser gewdê bajarê êşkince re
Çem li celdê di herike
Dibe...lehî...radibe
Gelêşeya kalanan li ber xwe dibe
Qamişlo te çi dîtî
Te çi bîna
Şêl ûbêl û halane
Ha wa hatin
Wek cirîdvanê berbûkan
Bi lewz û hoqboq û hayhay
Ha wa hatin
Bû xurîna "reşaşan"
Termên xortan
Weke şitlên rîhanê li bala rê
Li evîna xew lê çûyî mikurtên
Li risîna veşartî
Ha wa hatin
Wek siwarên dagîrkerên cengên berê
Guhan û goşî û leman
Didin bin pê û siman
Ha wa hatin
Nijindarê kujtarêne
Bobelatê pîroz dikin.
Rê û duryan
Bi çete û rêbiran siksikîne
Zikreşên kulibîne
Li ser bêhna xwîna min kewijîne
Dîsa mîna demên berê
Kurtêl xwerên li nav êlan
Dawdêlan diçikçikînin
Li sînorên gundên xwe de
Li goşeyên tarên ew lê
Li dor mal û mewdanê min
Qulûz qulûz...di qelizin
Didizin....
Qamişlo te çi dîtî...!?
Te çi bîna.....!?
Piştî xurîn û teqînê
Sawîr hişyar dikirin
Mizgîn tarûmar kirin
Pêwist bû kevok bifirin
Lê min bihîst
Di nav pencên qertelande di mirin
Min dî pisîkên mûdî
Ji nav merxên kujtarê
Nêçîra xwe dibirin
Dûra...dûra...
Pirça xwe di dalastin
Sinbêlên xwe badidan
Bê xem û guman
Min dî reşin di reşê de dibûrîn
Çend soz ji xwe re dizîbûn
Û şalikên mûsilî
Ne hinkûfî laşên wanî çarqorzîbûn
Ala welat
Li bejna wan ne dihat
Girêza wan
Bi girara pêjan dî re di bû
Hewdel
Li ber rivîna şewatê
Bûne çalak û degel
Hemî gewşek û gendel
Qamişlo te çi dîtî...?!
Te çi bîna...?!
Lehiya çilê vê salê
Nameya kêferatê bû
Min zanîbû bixwenda
Germa sibat û adarê
"Mizgîna" bobelatê bû
min zanî bû vexwenda...
lê bê xatir
bê oxir
bê pîlan û bê rêber
me rêwengî di bijart
me dilpakiya xwe dispart
mehderiya bedkaran...
belkî me bawer ne dikir
şevlêgerên
ku bi rewrewkêre bazaran dikin
wisa kîn pengihandine
"kepûlk me pûlk"
dinav qolincên me de çikilandine
kujtar bo me pilandine...
çendî caran min gotibû
tu bazên xwe di mijê de ne berde
kevoka xwe
di ezmanê biyan de ne firîne
nameya te nagihîne..
zozan li deştê dîq dike
heçheçîkan...
bihar anîne kabokê
û legleg xapandine
heyva me hate girtin
û dûvsitêr ne hatin xwar
perwaneya xwe sotandin
û çi mizgîn nebûn diyar
li pêşwazî darbestên evîndaran
çinge çing naqosê ne vedaye
û bangeha mizgeftê
bêdengî li xwe pêçaye
qêrîn rûte
hawar kûte
qedexene
lav û lavêj û bêlûte
hinek hatin
xaç ji xwe re kirin mertal
û hinek çûn..
kumê sipî yê tentene
di ser xwere kirin sîwan
û hinan bi gevezî
zixtên rexnê peyda kirin
xavika min pê dax didan
tenê tiliyên perwer...
kezebên şewitandî
bi serê pênûsan azad vekirin
kirin halan.
Tenê girdikên zigurdan
Li himberî gayê hêçî paçikxwer
Kurdayetî
Mîna alek sor hildidan
Qamişlo te çi dîtî...?!
Te çi bîna...?!
Xema ne xwe
Û rabe rêwengiyê
Bi kaniyên xewnê re bi bijêre
Di rodankên baxan de
Belatînk
Li benda tene
Bi bijêre
Nav rengên te diyarin ne veşêre
Raz û niyazan bi dêre...
Ê min bi xwe
Welatekî lave dikim
Di gêra pelê tirî de
Axpîne kê...
Ku têra fîxanê bike
Têra dîlanê bike
Têra reva leylanê
Têra firîna perwanê
Têra....
Çivanneyê bejna dîlbera min bike
Axpînekê
Têra dînbûna min bike.
Bêhna mine
Li mêrg û baxan vedaye
Û qawan û beybûnê
Rengên mirina minî geş wergirtine
Li vêderê
Li ba genimî pêşî
Di qada birîna min de zîl dida
Û bavê min
Pîşmendê alavê cot bû
Ev beriya mêrdînê
Xet bi xet wî di xepart
Seran ser medrebên birinc
Li hewînga nisêbînê
Ji kaniya reş û sipî av didan
Gurz û goşî û guhanên mêşinî
Li destên dayika min di baniyan
Rîs û teşî
Li nav darên şengebiyan
Xewnên keçan di hûnandin
Nêçîrvan bûm...
Li hawîrdor
Qaz û qumrî di firiyan
Ji sîpanê xelatê
Li pey xifşên xezalan
Şêt û şeyda di bezîm...
Li vê derê...
Damarên qadê qor bi qor
Ji şexna ta waşûkanî
Li henteşa min mikur tên
Tenûra himhimandî bûm li orkêş
Hemî kerwan û rêwîli ber bêhn û rivîna min
Dihenteşa topkêş de di hêwirîn
Wisa qada sobarto
Ji çûn û hatina min repin dibû
Û ev girên vegirtî li seranser
Ji ked û êşkinceya min rabûne
Dinavbera "apûm" û qamişlo de
Hino hino...
Avzêman xwe veşartin
Û sinbilên zeviyan
Seranserê vê deştê dagîrkirin
Qamişlo te çi dîtî...?!
Te çi bîna....?!
Derabe bîranînan tomar bike
Çawa cobara gijgij
Ji ceqceq cidadibû
Sînorên qada dînan diyar dikir
Zirt û horibandina "ebûdayis"
Şor û çîr û hêlhêla heygazo
Bangdana mele xelîl
Vedana dengê arifê cizîrî
Ji nav tarên azirandî
Ji pencerên tengî kulot...
Sîmfoniya qamişlo sazdikirin.
De rabe tomar bike
Derdoran bi nijinîne
Çendî dûr bin
Asoyên mizgîn vedayî
Rabe te nawestîne
Çendî kûrbin
Tîrên bi jehrê sûkirî
Canê te na pejirîne
Kerb û kîne...
Berê navê te diyare
Qamişloka evînê....
tirej.com
|
|
|
