Nezîr Silo

Salek ser serhildana gelê me ya li bajarê Qamişlo destpêkirî û li tevahî başûrê rojavayê welêt belavbûyî derbas dibe. Dema mirov vê sala derbasbûyî dinirixîne, dikare bibeje ku encamên vê serhildanê ji ailiyê gelek kes, hêz û rejîman ve û bitaybet rejîma Surya ve baş nehatiye nirxandin û nêzîkbûnek rast jî jê re nehate kirin. Lewama ez dixwazim di bîranîna salvegera serhildana Qamişlo de hin nirxandinên jidil bikim. Ji ber ku gelek bûyer û çalekî hene mirov nikarin encamên wan di wexta de û ji hemû aliyan ve binirxîn. Vê carê bi derbasbûna demê re û pêşketinên ew bûyer û çalekî bi xwe re derdixin ancex mirov wê demê mezinbûn û wateya wan fambikî.
Serhildana Qamişlo encama teqîna tengasiya rejîma Baas a despot ya li Surya, polîtîka inkara mafên kurda û berxwedana rejîma Surya li hember xweguherînê ye. Rejîma Surya ya ku bi destekî hesin li serhildanê da û bi awayekî hovane û xwîn xwest serhildanê têkbibe- dibe ku hin encam ji wî alî ve girtibe jî- lê îro di rojeva cîhanê de bûye dewleta herî dij demokrasiyê û mafê mirovan, tehlûka ser aşîtî û aramiya heremê. Bi vî awayî îro rejîma Bass a Surya hatiye xala li dij nirxên navnetewî, mirovatî û demokrasî. Xwe aniya xala yan dê xwe biguherîne, yan wê bi zorê bê guhertin.
Pêvajoya guhertina rejîma Bass a Surya bi serhildana Qamişlo re dest pêkir û bi serhildana gelê Lubnanê li dij hebûna serdestiya Surya gihaye lûtkeyekî, ku îro rejîm rû bir û li hember têkçûnê an xweguhertinê hiştiye. Di bingeha vê pêvajoyê de şehîd û giyanê serhildana Qamişlo cihê xwe digrin. Ji ber ku ev bûyer bû sedema bingehîn da rûçikê rejîmê yê rastteqîne derkeve holê û bi dijdemokrasî û pêlkirina mafên mirovan di rojeva cîhanê de bênasîn.
Xalek din a ku ez girîng dibînim eve, hêzên kurd jî nekarîn encamên rast ji vê bûyerê derxînin. Serhildanê rê li pêşiya pêvajoyek nû ji hemû aliyan ve li Surya da vekirin. Lê hêz û rêxistinên kurdî yên ku serhildanê ew li paş xwe ve hiştin û waneya herî rast bo tekoşînê da wan, dûr man ji xweguherînê û xwe li gorî şert û mercên hatîn guhertin binirxînin û sazbikin. Lewma di vê pêvajoya ku Surya bi xweşî an nexweşî ber bi guhertinê ve diçe, çiqas amadekirîne û hazirin tevlî vê pêvajoyê bibin??? Rewsha hazir de çiqas dikarin bibin hêvî û bawerî ji pêşengtiyek dîrokî re???
Ez vê rewşa lewaz û belavbûyî ya ku him hêzên kurd û him hêzên demokrat ên Surya di nav de weke helwestek şaş û bêwate li hember giyanê serhildana Qamişlo ya ku bi xwîna dehan lawên qenc û sedan birîdar xemilî, bi axîna hezaran girtî di işkencexanan de deng vedayî, dibînim. Ya din xafilbûnek mezin ji vê pêvajoyê ez ji aliyê wan ve radibihîsim.
Di encamê de rewşa hilweşînê ya îro rejîma Bass a despot di nav de, pêvajoyeke nû ye. Ev pêvajo wê ji bo gelê me – her çendî bi êş û zehmetî derbas bibe, dê mafên wî yên demokratî û netewî bi xwe re bîne. Rejîma Bassî bêgave xwe li gorî vê pêajoyê biguherîne. Bitaybet polîtîka xwe ya li hember hebûn û mafên kurda. Yan wê ew jî nola rejîma Bass a Iraqê binbir bibe. Di herdu rewşan de gelê me wê qezenc bike. Dîsa ez dubare dikim û dibêjim, pêvajoya demokratbûna Surya bi serhildana Qamişlo ve destpêkir ye û îro jî dighe lûtakeyê. Ji bo vê xwedî derketina li giyanê serhildana Qamişlo û nirxandina encamên wê bi awayekî rast, rêya me bibe ber bi desxistina mafên xwe yên netewî û demorasiye. Ev yek jî ancex bi bilindkirina tekoşîna demokrasiyê û xwerêxistinkirinê ve dibe.