Dilniya be

 Ezîz Xemcivîn

 Gewherê mebestê;

navê te jî

bi navê welatê min re

ve bû..!!

li bin ax û koka darê

rehên we

li hilma min geriya bûn

îşev

nizanim

kêzika viyana te

bi ku de diçe..?? 

li ser pişta banê mebestê

paldayî me;

peyvên stêrkan dihejmêrim..

çi havîn e;

çi şevîn e?

lorik û dewê çaxê

li ber min e..

geh gepê bi hêsran re dicûm,

geh şahiyê

bi strana Eyşanê re dibilînim..

ji mêvanan

ez kozikê ji te tenê re

dixemilînim;

 ji serok û qeralan re

axê

li ber pê te tenê

avrêjin dikim..!!

 terîşeke pîşo

li doza te tenê divemirînim..

te navê min azad kiriye

te şîlana min

li cegerê bi cî kiriye…!!

Te guldanka pakrewanan

li pencera dilî

geş kiriye..!!

gava çavan bêriya te dikir

hevokên hêwî

ji derya ziman î difiriyan

û geva dilî hizra te dikir;

li damarên kenoke

xwesteka dîtina te

har dibû..!!

dilniya be;

li evê dema dînoke

hemû qerpalên

çaxînî

ji firyana me bitirsin..!!

Sîmirê

bi şahî be;

Dêw şikestin

nema dikarin

yek parçî ji laşê te bibirin,

nema dikarin

çiraxên geşbîniyê

li govenda te bivemirînin…!!

29/4/2005

HEVGIRTINA REWŞENBÎRÊN KURDÊN ROJAVA LI DERVE