Va bihara jinan hat Delîlayê!
Keviyên xewnê ji bageran dawerivîne
û dilê xwe wek zengilekî bi dara jiyanê ve hilawistî bihêle!
Nehwirînên spî,
Pasvan û xilmaşiyên spî,
Awirvedanên xwe û gurîna agirê sirûdên spî,
Cegerdariya xwe ya ji sînorên spî,
Pinpinîkên lêvên xwe yên ji berfa spî,
Govenda xwe ya xatirxwestina spî,
Xwîna xwe ya ji gazina spî,
Rondikên xwe yên ji gunehbariya spî,
Destên xwe yên ji kevokên spî,
Kenê xwe yê ji destpêka spî,
Û dilê min ê ji miriyên spî,
Di bagera çiyê de sêwî bihêle!
Spiyê xwe bi şînê bazbenda min
Bi keskê jenê,
Bi sorê keviran,
Û bi mija qublenameyê av bide Delîlayê!
Tembînameyan li pey xwe, pesinînên heyvên şkestî,
Pêncereyên ku di hinasa te de vekirî mane, pêlên ku dihingivin bejna gernameya te ya ji nêrgizan, bahozan jî ji nişkê ve li pey xwe li ser baskên kurdistanê bihêle!
Karwanan bi ser westana çavan de bibarîne
Balindeyan ber bi asoyên matmayînê ve vehinêre,
Derbasî naveroka vê dîlanê bibe
Derbasî velerzîna vê biharê bibe
Derbasî sawa xatirxwestinê û derbasî birîna hespên elindê bibe!
Li Zagrosan binêre!
Zagrosan di himbêza xwe de bilorîne,
Zagrosan bi mûmên tiliyên xwe bialîne,
Zagrosan ji pêçeka şevê birevîne,
Zagrosan ji goridtanên bênav daweşîne,
Zagrosan bi xunava kenê xwe bikenîne!

Va bihara jinan hat Delîlayê!
Tu ber bi spiyê Zagrosan ve diçî û ez jî çurisîna kavilên berbanga Herekolan bi wêrekiya agirê xwe pîne dikim..
Gulgeniman dispêrim şevistana dilê xwe,
Û ji te re stiraneke spî di çeşnê azadiyê de dibêjim..

2008. 10. 16