Elmanya- Bad Salzufeln

Hevgirtina Rewşenbîrên Kurd ên Rojava li Derve, doh 08.11.2004, li bajarê Bad Salzufeln ê elmanî bîranîna şewata Sînema Amûdê û her 280 goriyên wê ên zarok bibîr anî.

Piştî rawestandina deqeyeke bêdeng li ser giyanê şehdîdên Kurd û Kurdistanê û guhdarîkirina awazeke kurdî bi lîstina ser tenbûrê ji hêla hunermend Remezan ve, rewşenbîrên beşdar dest bi pêşkêşkirina berhemên xwe kirin.

- Zagrosê Haco (Swêd), serokê H.R.K.R.D li ser dezgeha nûavakirî axifî û bal kişand ser pêwîstiya vê dezgehê weke sêwanekê bo hembêzkirina hemû rewşenbîrên Rojavayê Kurdistanê li derveyî welêt û herwiha pêdiviya wê bo parastina çanda kurdî.

Di destpêka axaftina xwe de Z. Haco, xemgînî û dilşewata xwe bi navê H.R.K.R.D bo koçkirina helbestvanê kurd Ferhadê Çelebî diyar kir. Z. Haco hêviya dilaramiyê ji malbata helbestvanê nemir re kir.

Di gotina xwe de Z. Haco ji beşdaran re bi firehî li ser kongirê damezirandinê yê H.R.K.R.D axifî  û mercên avakiririn û herweha pêşketina Hevgirtinê diyar kir.

- Hunermendê kurd ê şêwekar Fûad Gemo (Elmanya) weke şahidekî şewata Sînema Amûdê, beşdar bi axaftinên xwe ên nîgarkêşî kirin hevparê bûyerê û bîranînên xwe ên şewata Sînemayê bi beşdaran re par ve kir.

- Herweha Dr. Seededîn Mele weke şahidekî din ê şewatê bi gotarekê beşdarî çalakiya bîranîne bû.  Dr. Mele bal kişand ser giringiya şopandina bûyerên dîrokî û tomarkirina wan, nemaze bûyerek mîna şewta Sînema Amûdê.

 Ji ber Dr. Mele nikarîbû ji Swêdê bihata û beşdarî çalakiyê biba, gotara wî ji hêla Qado Şêrîn ve hate xwendin.

- Mele Ehmedê Namî bi pirtûka xwe „Agirê Sînema Amûdê“ bûyer ji windakirinê parast. Ferhad Ehmê du beşên kurt ji pirtûka Seydayê Namî ji beşdaran re xwend.

- Piştre, helbestvanê oxirkirî Ferhadê Çelebî bû mijara çalakiya H.R.K.R.D.

Hevalê helbestvanê nemir û hevparê wî di weşandina kovara Zanîn de, rojnamevan Ebdulbaqî Huseynî (Nerwêc) li ser jiyan û berhemên wî axifî.E. Huseynî rûkenî û dilgermiya helbestvanê nemir bibîranî û rol û karê wî ê çalak di kovara Zanîn de şirove kir. Wî herweha behsa berhemên Ferhadê Çelebî ên neçapkirî kir û hêviyên xwe anî zimên ku carekê ev berhem ronahiyê bibînin.

- Piştî bêhnvedanekê, beşê duwemîn ê çalakiyê ku ji helbestxwendinê pêk dihat, dest pê kir.

helbestvanên kurd: Axîn Welat (Swêd), Ebdulrehman Efîf (Elmanya), Ehmedê Huseynî (Swêd), Hoşeng Broka (Elmanya) û Mihemed Efîf Huseynî (Swêd) helbest û têkstên xwe ên wêjeyî ku bêtirî wan derbarê şewata Sînema Amûdê û Serhildana 12. Adarê bûn, xwendin.

- Di pey xwendina helbestan re derfet bo guftûgoyê bi Komîteya Kargêr ya H.R.K.R.D re vebû.Endamên Komîteya Kargêr: Zagros Haco,  Axîn Welat, Ebdulbaqî Huseyni, Ehmed Huseynî, Ferhad Ehmê, Selah Eldîn Bilal, Qado Şêrîn û Reşîd Hiso beşdarî guftûgoyê bûn.Di dawiya çalakiyê de beşdaran hêviya serkeftinê bo karê Hevgirtinê kirin û bi pêşniyaz û nerînên xwe simînar bi dawî anîn.

Komîteya Ragihandinê

Hevgirtina Rewşenbîrên Kurd ên Rojava li Derve 

08.11.2004