We got Qamişlo !

Yar

Di bin darê zorê de

Nabin neyar û

Neyar li ber ava kewsrê jî

Nabin yar ...

Ew kesên geh

 yar in  geh neyar in

Wê bibin komir di nav agirê

Durû û duzimaniya xwe de ;

Ava biradostiya zelal

Ji xwêya bêwijdaniya wan

Girik nabe ,

Cegerdariya mêrên çê

Li ber bahoza zor û setemkariyê

Nayê tewandin

Nayê livandin

Nayê şikandin ...

 Cegerdarî

Wê bibe qamçî û xencer

Ji bo ewrên reş hilên ji ser rojê û

Dîrok bê şûştin

Ji gemar û tozê .

*****

We got Qamişlo

Deryayên bê deng

Li ser peravên

Bajarên xewin û hêvîyan

Xilmaş bûne ,

Xweş zanin

Ku silavên sar û cemidî

Di kelkela germa havînê de

Wê sar û bê tîn bin ,

 Ne her lêvên girnijandî

Nîşana zelalî û bêrîbûnê ne ,

Çendî em destê xwe

Dirêjî rastiyê bikin

Maskên sexte

Ji ser wan dêmên kenok

Têne xwarê ,

Dibin taxek mezin

Ji bajarên şehlewendiyê

Û sed mixabin ...

Rastî xwe kerroke dike ,

Ber bi aşopiyê ve direve

Derew , şelafî û edxemiyê

Li şûna xwe dihêle ;

Belê ... kesera mirovantiyê

Ji dîliya kelevajiyê aza dibe

Dide pey şopa rastiyê

Maskên sexte û derewîn

Li ber xwe

Rût û tazî dike ,

Wan didêre û dihêre û

Tavêje binê embarên jibîrkirinê ,

Genî dibin ... dipiçpiçin

Ji ava vê gemariyê

Dibin  benîşt  di nav diranên

Roj û salên bênamûs de ...

*****

We got Qamişlo !

Rêkên agir û dijwar

Dibin pêyên wê de dicefilin ,

Yekê sibatoka dînik

Ew hejand lê qet neşikand ,

Xweliya ber êvarê di roja

Diwazdê adara xwînlî de

Bû bahozeke xeniqî

Di gerdena cegerdariyê de

Cegerdariya te Qamişlo .

Buhara

Bi xwînê bi xemile

Nekizire û geş bimîne ,

Nanê ku bi hêsir û xwêdanê

Binime û êşa birçîbûnê bikuje ,

Axîn , nalîn û hawara

Ku di qefesa sîngê de

Winda nebe ne fetise ,

Bîr û baweriyên resen

Ku li ser û bin maseyên

Tirs û bazirganîyê de

Neyên dotin

Neyên firotin

Neyên kuştin ...

Wê mirinê bikin jiyan û

Jiyanê bikin stiran ,

Mane bese ??!

Kefenê êş û derdan

Ji lorandinê rizîya ,

Dêmê roj û salan

Di asmanê welatên bê war de

Ji pencên wêranîyê

Bûne gelî û newal .

Meyxana mirinê

Birînên lawînî û mêrxasiyê dike

MEY

Û di peyalên qederê de

Li mirîyên zindî digerîne .

*****

We got Qamişlo !

Serencama civîna

Pêxemberên Kurdayetiyê

Li goristana Şêx Xalidê Neqşebendî

Serê bahozê di bin

Baskên xwe de tewand

Nalîna ( Gazinda Xencer )a

Mîr Celadet Bedir-xan

Lepên bê mehderan weşand ,

Çiyayê Qasiyûn

Ji sûbûna wê hejiya ,

Ava Fîcê ji ber germahîya

Dengê wan Pêxemberan

Rawestiya ,

Bêpirs

Şerim kir xwe negirt

Ji pirtûkxaneya ( Elzahiriyê )

Reviya ,

Û Selah Eldînê Eyûbî

Isa yê Pêxember

Ji ser xaçê daxist ,

Li şûna wî xwe xaçe-dar kir

Bê poşmanî bê dûdilî got :

Ew buhara min çand

Mir û şewitî ...

Ma bê sirûd û stiran ;

Min Orşelîm kir musilman

Lê mixabin ...

Toza salan li min zîvirî

Îro musilman bûne

Rim û şûr

Li ser sînga Kurdan .

****

We got Qamişlo !

Wê adarek here û yek were ,

Lê adara xwînê

Wê bibe heyv û roj

Berf û baran

Stêr û stiran

Li ser sînga her

Çar demên salê ,

Wê jiyanek bimire

Lê yeke nû wê bibişkive

Bela navan biguherîn in ,

Rûbarên birînan biherikîn in ,

Berik û gulleyan

Li ser sînga mirovantiyê biçîn in ...

Mane emin mirin

Na ... em li pêşiya mirinê dimeşin

Erê ... Em li pêşiya mirinê dimeşin .

*****

We got Qamişlo !

Xetîrên welatan

Azadiye

Rastiye

Cegerdariye ...,

Dergeh û pencereyên ku

Di bin pêyên rojên lewitî de

Herifîbûn ...

Bi ava berbangên nû re

Ava dibin ,

Ronahîya xaka reş

Mirina xweşik hildibjêre ,

Li ber çirûskên vê ronahîyê

Encûmenên şîn û şadîyan

Lavij û ayetan

Di holên jiyan û mirinê de

Ji pêşerojê re

Di xwîn in .

*****

We got Qamişlo !

( Bi kulîlkekê

na be buhar lê

Kulîlkek nîşana buharê ye )

Û buhar nîşana

Geşî û felatê ye ,

Qamişlo  xweş zane

Li warê wê

Kî yare , kî neyare ?!

Kî bi ware , kî bê ware ?!

Kîne Qira-kewên dîl

Zordar û  setemkarên kwîr ...

Qamişlo pîr nakin û

Nasnama wê winda nakin ,

Evîn paytexta wê ye û

Lehengî warê wê ye .

*****

We got Qamişlo !

Deng û bê dengî û vedengî

Bi yek dengî dibêjin :

Aferîn sed aferîn

Qamişloka xwînlî aferîn .

01/02/2005