Bihar hat keran tûr avêt

  Serkeft Botan:

rojava.net- 18.02.2009

 Li dora heştê sal in ku li Tirkiyeyê kurd ketine sikinca xwe û weke mirişka ku serê wê xistibin bin bazikên wê. Serdestên kurdan ji wan re dibêjin heger hûn xwe bi vê hêlê ve bibin derya bêbiniyê heger ku hûn xwe bi hêla din ve bibin agir û cehenema bêserî ye. Ya rast ew e ku hûn xwe tev nedin. Ev jiyan li me kurdan hatibû fesilandin û jiyan li me qusandibûn. Bi destpêka berxwedana netewî ve gelê kurd serê xwe ji bin baskê xwe derxist û ji nû ve bala xwe da cîhanê û mêze kir rewşa jiyana ku tê de dijî ne rewşeke baş e. Ji serok û pêşengê xwe re guh seridand û bîbika çavên xwe kuta çiyayên xwe mêze kir ku sewta qîz û lawên wî ji navsera çiyan tê. Bi rastî tu bibêjî ev hesreteke civakan kurdan a bêrîkirin û serxwebûn azadiya wî bû ew sewta hanê. Di serî de belkî şik û guman kir lê pêl bi pêl dema ku têkoşîna rizgariya wî li deşt şewil û newalên wî bela bû. Şikirbûna xwe ji xwedayên xwe re anî û kir hewar got bihar hat bihar hat gelî gundiyan malbatiyan û welatiyan keran tûr avêtin. Bi dil û can xwestin ku pişgiriya têkoşîna azadiyê bikin û pesin û beradên zarokên xwe û gerîlayên xwe kirin û rabûn ser tapana azadiya xwe. Ew kurdên ku bi hezar fen û fûtî hatibû xapandin û ketibû xewa mirinê bi tîrêjên ku ji navserên çiyayên wî dida textikê eniya wî ew şiyar kir û rê li ber ronî kir. Xwe nas kir civaka xwe nas kir têkoşîna xwe nas kir rêxistina xwe nas kir sazî û dezgahên xwe nas kir partiyên xwe nas kir gerîlayên xwe nas kir û serokê xwe nas kir û bi ser de dost û neyarên xwe nas kirin. Felsefa serokên xwe û neyarên xwe dan berhev û danuhurandin. Her ku danuhurandin parzinandin kir xwe bi ber heq û edaletê ve kişandin û neheqî nalet lê barandin. Kesên ku bi fen û fûtiyan ew dixapandin xwe ji wan dûr girtin. Hînajî ev pêvajo li Kurdistanê nehatiye qedandin û bi lez û bez tê ajotin.
Her ku kurd şiyar bûn serdestên wan ji wan qehirîn ji ber ku berjewendiyên wan derdoran ên ku bi peyvê tiştin digotin û bi wan gotinên xwe nanê xwe pê dixwarin. Ew derdorên ku digotin en demokratin an sosyal demokrat in an komînîst in an sosyalîst in an lîberal in û weke wan. Ev derdor ne ku dijberiya civaka kurdan kirin. Dezgeh hizip sazî partî û serokên kurdan jî dane ber xwe dijberî û dijminyetiya xwe aşkere kirin.
Em bêjin ew kurdên ku emrê wan 50’î û jê wêdetir e û ku li Kurdistanê xwedî kariyer an burokrat bû ji ber ku berjewendiyên wan kesan ketine talûkê ne ji gelê kurd ne ji pêşengê azadiyê û ne ji serokên kurdan hez dikin û dijminatiyê dikin. Ji ber sedema ku ev kes nema karin li Kurdistanê siyasetê bikin û ku kurdan bixapînin. Ji ber ku pêşengiya gelê kurd ew deşîfre kirin, kumikê wan ji serê wan kir û da bin cengên wan. Ma mimkûn e ku wê ev kes ji kurdan an ji serokên kurdan hez bikin an xatir bidinê. Di nava van kesan de bes ne siyasetmedar an burokratên kurdan bi tenê ne. Hinek oldar, nivîskar û wêjevanên kurdan jî bi ber vê pêla bayî xwe dihejînin. Dibêjin çima gelê kurd li serokê xwe xwedî derdikeve û gel sûcdar dikin.
Beşek ji lîberal û demokrat û nivîskarên tirkan jî gilî û gazinên xwe bi gelê kurd dikin û dibêjin çima gelê kurd li serokên xwe xwedî derdikeve. Dijminiya gelê kurd dikin û a serokatiyê dikin. Ma gelo derdê wan çiye.
Beriya ku gelê kurd hişyar bibe û bibe xwedî rêxistin û xwedî serok van derdoran li Tirkiyeyê û li Kurdistanê bi awayekî rehet jixwe kar û barê demokratîkbûnê dikirin û ew sembol bi rehetî bi xwe dadikirin. Heta ku berî pêşengiya gelê kurd bibe xwedî bandor gotina kurdbûniyê û navê Kurdistanê jixwe bi kar netanîn. Piştî ku kurd derketin pêş ev derdor mecbûr man ku navê kurdan û welatê wan Kurdistanê telafûz bikin. Ji ber van sedeman stêrka wan derdoran jî pêşengiya gelê kurd rijand.
Deng û his yekcaran ji arîstokrat û demokratan ji dihat behsa aştiyê dikirin. Tu rastiyê bibêjî aciziya van derdoran dema ku artêşa tirk û gerîla li hev didin hizûr û kêfa wan direve û gelek berjewendiyê wan dikevin talûkê. Bi rehetî nema karin nivîskariya erzan bikin. Daxwaza van derdoran dibêjin bila pêşengiya gelê kurd dev ji çeka berde lê newêrîn bêjin bila artêşa tirk jî dev ji çek û operasyonên xwe berde. Li gor van arîstokrat û demokratan pêşengiya gelê kurd zarok jin û ciwanên kurdan dixapîne û wan li dijî Tirkiyeyê bi kar tînin. Ev hêla arîstokrat û demokratan pirî sextekar û di warê pirsgirêka kurd de hem pêşengiya gelê kurd û hem gelê kurd dixapînin ji serdestên xwe re pisîk in û ji gelê Kurdistanê re dibin şêr. Lê kî çi dibe bila bibe li Kurdistanê “bihar hat û keran tûr avêt.”

ji www.welat.com