Revyan

Royarê Amedî    

Rêveçûneke ji leylanê,

Tev hin rengên aramiyê dibe,

Surûdeke lehiyane, di deşta dilekî ji xwe winda....

                                                                 dihingivîne

Gelo bi çi pesnê ev rêveçûn tête dengdar kirin,

                                    û bi çi awazan tête xemilandin?

Avek e ji bendemanê,

Tev hin ”ne li bîrên“ mêvanên spîdeyan dibe

di mişextiya dengan de, yan di têkveçûna wan de,

Sîkine jiyanane, ji gelemperiya mirinan re

                                                                  Şîndar dike

Gelo deng gava ku ji nefel û lavên xwe têne vala kirin,

                                                       bi çi gewdedar dibin?

                                                       yan çi bi gewde dikin ?

 Leylan xewno:

Rêveçûn , bi hilm û ritma xwe ne ew rêveçûn e

Av , bi têkveçûna qeware zemînan ne ew av e

Xewne pêngavo:

Gul , di serkeftina rêveçûnan de pesindar dibe

Dil , di şevnistiya evînan de  bendewar dimîne

                                      û rûpelên stêrrijyayan vedike

Kes , li ba xwe nema ye, yan di xwe de, ku karibe

                hilma şevînî , ji ser çirisîna li hevhatina xweyînîyê  rake

Ji xwe biyan bûme

di vê têkveçûna  nêrgizyane de, ji xwe biyan bûme

Da kengî, ez ê karibim

Bi lav û niviştên dêpîran

Temenên jibîrçûnên berî têkveçûnan vegerînim

Da kengî, ez ê karibim

di vê revyana bê dawî de ,

gurzeke asîmanî , ji azerînên revyanê

                           deynim pêş kêla jiyana xwe.

                                     û pêngaveke ji avê li ser rêveçûna ji leylanê

                                                                                             tomar bikim ?

Hannover : 10 . 01. 2005

HEVGIRTINA REWŞENBÎRÊN KURDÊN ROJAVA LI DERVE