Heyamek sêv ji pêjna te
 

Pêjna te,

ya ji sêvan heta bi sêvan,

her ku roj tê ber êvarê,

heyamek pencere ji yasmînên

zû ye.

pêjna te,

ya ji tozê heta bi tozê,

heyamek sêv

û delîveyek hembêz hingûr e;

hingûra mişt bîranînên

ji genim;

ji keska fereh û keserdar,

a navbera navê min û te;

ji vegirtina sînorên ebedê;

yên di xwîna me de,

heta hetayê li dar;

û mişt bîranînên ji tozê, ku em

ji harbûniyan dibirin harbûniya

û ji tazîkirina çeman

dibirin tazîkirina çeman.

pêjna te,

ya ji dûriyê heta bi dûriyê,

heyamek sêv

û delîveyek hembêz hingûr e;

hingûra ku ji haştkirinê

diçû haştkirinê;

haştkirina penceryên dûr;

destên dûr;

destmalkên qewêtiyên dûr;

ax û avên dûr;

nimêjên dûr;

Xwedayên dûûûr;

û haştkirina

çavên bendewariya dûr,

yên ku rengên xwe

li ser alên hicrikên dûr,

ji bîr kirîn .

pêjna te,

ya ji westanê heta bi westanê,

heyamek sêv

û delîveyek hembêz hingûr e;

hingûra ku ji gulên berbero

û wêdetir, diçû haştkirinê;

haştkirina bîra

ji destên bê sibeh,

dergehên bê xanî,

pencereyên bê axaftin,

û bîra ji rêyên bê basa karwanan

û bê gavên,

ku ji westanê û wêdetir diçûn.

pêjna te,

ya ji dîlokan heta bi dîlokan,

heyamek sêv

û delîveyek hembêz hingûr e;

hingûra ji êşa,

ku li ser çiçikên deşta mijê, razayî,

û ji dîlokên destên

ku li ser gwêzikên pembo

xwe ji bîr kirîn.

pêjna te,

heyamek sêv

û delîveyek hembêz hingûr e;

hingûra mişt kesera navê Xwedê,

silava ji hatina tivîlkan

û şîrikê gulan.

pêjna te,

heyamek sêv

û delîveyek hembêz hingûr e;

hingûra ji hatina silava

memikên ji avê,

lêvên ji erxewanekî  zû

û gulberojên ji navê bêrîkirinê.

pêjna te,

ya ji sêvan heta bi sêvan,

her ku diçe êvarê,

heyamek sêv

û delîveyek hembêz hingûr e,

bilez diçe ava

û dibe aliyê tikî tenê,

li ber pencereya

dilbijokiya min dilûse,

û bê pêşgotina

ji qefdên gulan û helbestan,

asîtank bi asîtank,

xanî bi xanî,

û lavlavk bi lavlavk,

sêv û sêv, li  navê min,

yê ji çaxê navê te ve,

mikur tê.

HEVGIRTINA REWŞENBÎRÊN KURDÊN ROJAVA LI DERVE

Li wir ... ku gombûn mezin, dizê(2/5)