Berxwedan ji mafê mine, lê ne ji mafê we ye

Hêlîn Remê

 Peyvdarên rêjêma Ba's li Sûryê, di hemî daxuyan û hevpeyvînên xwe de bi ragihandina Erebî re, bervaniya tîrorê dikin, bi mehna berxwedan û tekoşînê dijî dagîrkeran, bi taybet ew kiryarên tîror li Îraqê, ev arîkarî û piştgiriya rêjêma Sûryê ji tirsa têkçûna wê ye.

Heger em li ragihandina fermî ya Sûryê vegerin, wê ji me re pir peyvên piştgiriya teroristan diyar bin mîna van peyvan "Berxwedana millî li Îraqê – rikebera Îraqî - leşkerên dagîrkeran – di êrîşên dagîrkeran li ser xelkên sivîl li Felûca ….û h d", li gel ku pir dîkomen hatina girtin bi wan teroristan re rola rêjêma Sûryê têde heşkereya, û her roj tilya Sûryê beloq tir dibe dijî rêjêma Îraqê ya demî.

Di baweriya min de ev kiryarên rêjêma Sûryê ji tirsa pêşerojê ye, çimkî her roj peyamek gefekirinê Ji Sûryê re tête rêkirin ji USA yê, li gel ku pir pirojeyê Emerîka diyar dibin dijî rêjêma Sûryê, lewra ev piştgiriya Sûryê ji teroristan re bersiveke ji wan gefeyên Emrîkî, lê wê rêjêma Sûryê ti sûdeyê jê negire.

Ji bo berevaniyê di ber helwesta xweyî xerab de peyvdarên rêjêmê hin mehnan ji xwe re diyar dikin, wekû ku wezîrê ragihandinê di hevpeyvîna xwe de bi "kanala alarabiya" re Mihdî Dexlelleh weha bersiva pêşkêşa bernameya "BILAREBÎ" dide: "Yadê niha ku mirovek were mala te ji te bistîne wê helwesta te çibe, mane gerek tu bi hemî hoyan berevaniyê di ber mafê xwe de bikî, ma ne wusa ye". Li vir em dixwazin pirsekê bikin, gelo wê helwesta Dexlelleh çibe gava Selîm Kebûl Kurd ba û ew Şehîdên naverasta Qamişlo Ereb bane, helbet bersiva Dexlelleh ji me tevan re diyare.

Li gor destpêka êrîşa Felûciyên Ba'sê Sûryê di 12ê Avdara sala bûrî de li ser bajarê Qamişlo, û di wêneyên vîdiyoyê de diyare ku Felûciyên Dêrazorê dest bi êrîşê kirin bi arîkariya polîsên rêjêma Ba's ya ku xwest kula ketina B'siyan li Îraqê di serê Kurdan ve derxe, pêrejî dixwestin Kurdan bi tirsînin, ji bo rojekê serê xwe û dengê xwe nekin di rûwê zor û sitemê de.

Bêgoman ev pîvana tevlîhev û gêj ku hew rêjêm dizane ew çidike, nîşana dawiya wê yê lê em wek rêberê siyasî ji gelê kurd re "wekû tevgera Kurd" gelo me xwe amade kiriya ji guhertinên pêşerojê re, yan jî hîn me xwe ji hindurê van rêkxistinên ixtiyar re (kal) derbas ne kiriye, ev ixtiyariya han di bernameya "Raste Rast" a "ROJtv" de, di 4-1-2005ê diyar bû, di peyva herdû sekreterên (YEKÎTÎ) de, dema mamoste Hesen Salih weha digot:" li ber dergehê dadegeha ewlekariyê 2 partî (Hevgirtin û Çep) bi me re tên, û tu aliyên din nayên…", lê ya xerab tir peyva mamoste Ismaîl Ûmer, dema digot, û ew bi xwe dizane ku ne rast dibêje:"pirtirîn kesên ku amade dibin li ber deriyê dadegehê hevalê me ne, lê em ne ji wan rêxistinên ku bangewaz û daxuyaniyan derxin, bi tenê em partiyeke, kar û xebata xwe dikin bê dengênî.

Bibûrin, kar û xebat ne wek we her diwan ne, vaye meha Avdarê nêzîk bû û hîn me rêzgirtina xwîna Şehîdan negirtiya, û hîn em wek berî Serhildanê di meşin, pêrejî em dixwazin baweriya milletê xwe bi wan rêkên partiyetî û ezîtî bînin, û em xwe vegerînin nakokiya biratiyê, xuyaye Dexlelleh rêberiya me dike û em wekû rêjêm ji me re wêne dike em li ser dimeşin, raste em miletekî aştiyane ne, lê ji her tiştê re sînor hene û ((destê tirsok sînga sipî nabîne)).

Tirbespî- 5-1-2005