Azadî  bo Mişeel Temo

Di 15.08.2008an de siyasetvan û nivîskarê kurd Mişeel Temo ji nişkê ve hate windakirin. Tevî ku rêjîma Sûriyê ta nuha  revandin û girtina Mişeel Temo eşkere nekiriye, lê hemû tiliyên tawanbariyê ber bi vê rêjîmê ve diçin, nemaze ku dîroka wê mişt e ji nimûneyên revandin û windakirina dijberên wê û çalakvanên azadî û mafê mirovan.

Mişeel Temo yek ji çalaktirîn kesayetiyên kurd e ku bi taybetî piştî serîhildana 12 adara 2004ê roleke giring û berçav lîst bo gihandina dengê kurdan bo raya giştî, parastina buhayên serîhildanê û çespandina mafên gelê kurd.  Ew bi têkiliyên xwe yên bi kesayetî û rêxistinên erebî yên Sûriyê û nivîsên derbarê pirsa kurdî de hatiye naskirin. Ew herweha berdevkê fermî yê Şepêla Pêşerojê ya Kurdî li Sûriyê ye.

Girtina Mişeel Temo bi vî rengê ku li bejna çete û keleşan tê, revandin û piştre kuştina şêx Maşûqê Xiznewî di gulana 2005ê de tîne bîra mirovan. Ji ber ku eynî rêjîm û herweha eynî hişmendiyê her dû kes revandine, ne dûr e ku Mişeel Temo jî bibe xwediyê eynî  çarenûsê. Ji ber vê yekê em tev de berpirsiyar in di ber parastina jiyana wî de.

Hevgirtina Rewşenbîrên Rojavayê Kurdistanê revandina siyasetvan û nivîskarê kurd Mişeel Temo şermezar dike û wê wek yek ji nîşanên siyaseta hovane ya rêjîma Sûriyê dinerxîne.

Hevgirtina Rewşenbîrên Rojavayê Kurdistanê bangî hemû hêzên kurd dike ku bo azadiya Mişeel Temo têbikoşin û bo vê yekê amadebûna xwe bo hemû cûrên karên hevbeş diyar dikin.

Dem bo bêdengiyê nine!

Azadî bo siyasetvan û nivîskarê kurd Mişeel Temo

 Hevgirtina Rewşenbîrên Rojavayê Kurdistanê

18.08.2008

 h