Dİ PAYİZA TEMEN DE
 

rojava.net 14.April.2005

 Arsevê Oskan

Xapînokekê

Şaxên dîlîtiyê

Li bejna sewdanên min

Li ser sînorê dil dipêça

Dînekê ..

Li nav baxên dil

Seyraneke tazî digerand

Ji kanîyên bêrîkirinê

Çend dilopên sar

Bi lêvên sor mêtin .

Di payiza temen de

Xunaveke hûr

Bi ser hestên beyar

Û kavilên westiyayî

Bi dîlaneke germ barand

Lê, mêbûna qadê ne`afirand

Û pezgoviyên xwe

Li deştên birîndar

Bi hêsanî neçêrand .

Di payiza temen de

Çend hêsirên germ

Ji çavên bendewar

Bi lez dane rê

Bi ser dêmên sar de

Xatir xwestin

Pê tovên poşmaniyê avdan

Ne ewrên reş

Ne dilên geş

Ne peyvên xweş

Li dergehên hêviyan

dibin mêvan

ne Memê bendewar

ne bilbilên evîndar

ne helbestvanê xembar

li ser dilbera xwe distran .

Di payiza temen de

Xecxecokên dêmsor

Di xewa giran de

Di nav pêlan de vedigevizîn

Tîrêjên awiran

Di bin akama poşmaniyê de

Ji asoyên bê sitûn têne xwar

Bi ser lêvên lerizok de

Û di xew re diçin .

Di payiza temen de

Zarotî li keşwera bîranînan

Dibin mîr

Û şûrê mezinbûnê

Ji pêsîra xwedan diçinin .

Tavên buharê,

Çiyayên agirîn

Ji pêla wan ditirsiyan

Tenê xulmaşiyek

Ji çavên temen

Bi rondikekê

Wan dilerizîne ...  Di payiza temen de .

HEVGIRTINA REWŞENBÎRÊN KURDÊN ROJAVA LI DERVE