Çîrokên çavan 

pir xweş in…!!

gava li hev dicivin

û ji hev re dibêjin: 

evîn

bê me nagihê,

evîn

bê me na kelê

û bê birajtin 

bihin û dû

pê nakevê.. !!

Çîrokên çavan 

salixdana bêriyên hergav 

hilî di canan de 

têne çandin…!!

Wek buhar û avê 

yek nerîn

dimeye…!!

War û hêlîn 

li ser qeymaxê çîrokan 

ava dikê  …!!

Çîrokên çavan

ta bi ta 

tevna miradan dihûnin

bi hev girêdidin …

Çi xewn,  

çi bîranîn,

yan peyman û sozbirîn,

rasterê

zimanê çavên evîndar

peyvên heyvan

bi dilan dide zanîn…!!

Ev buhar û evîn 

civanê 

çavên gulê û pinpinîkê 

dem bi xêr be… 

bersiva  çavên hîvê

ji çavên rokê

dil bi dil li hevûdu dinerin  ..!!

Bi çavin zelal

bînahî li pertûka ramanan diçêre…

deşta çavên evîndar

bi şahiya xwe 

rojan li temen na hejimêre     

21/3/2001

Dûrî

 {Ez dûr im û tu jî dûr î,

hey Ronak dibêjim te were}

 Dengê te li ber guhê min e
xweş e,

Zîz û zelal e..!!

Rengê te li ber çavê min e,
mîna şeva sersal e...!!
 

Hey evîn tal e bi me
şekirê Şamê !!?

Ez dûr im û tu jî dûr î
me warê xwe berdaye...!!
 

Canê min bû êzing
dilê te bû agir
bi xwîna min re geriya
û rewanê te
di ûjdanê min de meya ye...!!

Pêlên evîna te
ez li ber çûm
wek gawiran dûrkirime
ji gemiya Nûh..!!

Hey Cûdî
ez li bextê te me
li kohê pêsîrên xwe
ji taloka yezdanan
min biparêze...!!

Min divê bi wê gerdenê şa bibim,
bi bêhna sosinên welatê xwe
ez şiyar bibim...!!
 

Min divê ji gewriya kaniya te
bi serbestî firek av vexum..!!

Ez dizanim
tu jî weke min î
nerîna te li mizgîniya

nama min î,
de were...

de were...

de were…

Va ez jî bi ber te de têm
kengî em ê bigihên hev?
kengî em ê bêriyên xwe 

bikin  berdêlî?
 

Bi ken û girî

pîvanê bişikînin;
destê te bigrim
ne xewn be;
hêviya me pêk bê
ne guneh be...?
buhara me şîn bê,
miradê me bi cî bê,
bela pelê dûriyê bitemire...!!

Here û bê oxir
ji navbera dilên me
bifire ..

û bifire...!!

17/8/2001