|
Pirsgirêkên me kurda gelek in , ji ber pirbûna
wan jî .. em nizanin ji kûdê despê bikin , heçî
rabe pênûsa xwe bigre ..gotarekî dinivîse ,
gotar jî di çarçûveyeka giştî de tê ristin , kes
destê xwe na deyne ser birînê û nîşan nake
,nimûneyek piçûk ez dixwazim diyar bikim.
Gelek karmendên kurd di saziyên dewletê de hene
, û piraniya wan jî heval , an jê alîgirên
partiyên kurdî ne , gava rebenekî kurd diçe
weceka xwe pêkbîne di wê saziyê de , ew
rewşenbîrê kurd ê karmend bi çavê şelatî û dizan
li wî hejarê gundî dinêre , karê wî nameşîne ,
sed perpêkan didiyê , wî sergêj dike .. ta ew
perîşan xwe bavêje torûbextê wî ( ji xwe bext
nîne ) ku çarekî jêre bibîne û weca wî pêkbîne ,
bi vî rengî ta bikare ew karmendê kurd ê diz wê
peran jê biçeqîne , û bi dilekî rehet wê êvarî
biçe civîneka siyasî yan çandî , tişta seyr ewe
ku ew karmend vê rêbaza xwe ya sexte bi
belengazê kurdan tenê re dike , ger yek Ereb ,
yan file here wê kargêra wî ..ew di ber de
radibe û qehwê jî jêre dixwaze .
Tişta ez dixwazim bêjim ew e ; çima şev û rojan
em gazinda ji dewletê dikin; astengan ji me re
dertîne , gendelî ( fesad) li her derî ye ,
guhdan bi me nine . . . baş e ev nêrînin rastîn
e , em di vê ti hêviyan ji neyarê xwe nekin ku
wê xweşiyê li me bibarîne , lê gelo çima
rêxistinên me behsa gendeliya van karmendên kurd
nakin di belavokên xwe de ? çima wan şermezar
nakin di civat û civînên xwe de ? çima wan dûrî
rêxistinên xwe nakin ?
Nimûneyek dî ku gelekî zelal û berçave , û her
malbata kurd.. jê dikşîne ew jî eve ; di
dibistan û xwendegehên herêmên kurdan de
piraniya mamosteyan kurd in , ji xwe 70% pitir
şagirt jî kurd in , lê ew mamosteyê ku mûçe yê
xwe ji dewletê distîne da wan zarokan hînî zanîn
,sinç û perwerdeyê bike ..tu dibînî bi delametê
xwe ranabe û zarokên kurda dihêle di nezanî û
tarîtiyê de .
Gelo gazind ji kî tê kirin ?
Gelo ev diz û bê-ojdan ku asta herî li jor di
civakê de -ji hêla têgihiştin û bawernameyan ve-
digrin .. di rêxistinên ku pêşengê gelê mene de
cih digrin .. çi hêvî wê di wan de hebe , û wê
çawa ev gel bi çarenûsa xwe bighe ? çima em
gazinda ji gel dikin ku dûrî rêxistinên xwe
ketiye ?
Xwezî her yek ji me di cihê karê xwe de
welatperweriya xwe diyar bike , ne di civat û
şahî û xwepêşandana de !
Bila cegerê me hehe em kêmûkasan bi dengekî
bilind nîşan bikin, û hemî diz û derewînan
eşkere bikin , hingî emê pitir baweriyê bi hev
bînin û civaka xwe jî hînî rastiyê bikin.
Divê em şûjina di çavê xwe de berya derziya di
çavê xelkê de bibînin .
|
