Şêx Maşûq, qurbaniyê guhertina mezin…
Tariq Hemo

Di 1.6.2005 an de û piştî vegera wî ya ji Ewrûpayê, dewleta Sûriyê ya stemkar, zaniyar û oldarê kurd yê pêşverû Şêx Maşûqê Xeznewî bi şêweyekî hovane û piştî êşkenceyek mezin kuşt. Biryara kuştina Şêx Maşûq yê ku roj bi roj cihê xwe di dilê gelê kurd li Başûrê Rojavayê Kurdistanê de digirt, ji berpirsiyarên ewlekariya Şamê yên herî mezin û payebilind derçû.

Çima biriyara ji holêrakirina vî mirovê aştîxwaz?

Ji ber ku Şêx Maşûq dikarîbû bibe simbola têkoşîna gelê kurd û hemû hêzên muxalefeta Sûriyê û ji ber ku zaniyarekî ola îslamê ku li ser asta navdewletî dihat zanîn û bi mînaka îslama pêşverû û reformkirî bang dikir, ew ji aliyê hêzên muhafezekar û tarî di rejîma Essedê kur de hat kuştin.

Xîtaba Şêx Maşûq li ser 2 astan dihat dîtin:

1- Pirsgirêka kurd: Şêx Maşûq nêrînek netewî derbarê pirsa gelê kurd li her parçeyên Kurdistanê de hebû. Wî bawerî hebû ku gelê kurd yê welatê wî Kurdistan di nava 4 dewletan de hatiye parçekirin û parvekirin, mafê serxwebûn û avakirina dewleteke netewî heye. Ev nêrîn jî her car dubare dikir û li her cihî diparast.

2- Mînaka îslama pêşverû û reformîst dida pêş: Li himberî pêla nijadperestî û fundamentalîstê ya li herêmê pêş ketiye, têza biratiya olan derdixist û li dijî terora rêxistinên Islamî ya navnetewî deng bilind dikir.

Di vî warî de jî di gelek konfransên navdewletî li Ewropa û Rojhilata Navîn de amede dibû û nêrînên xwe eşker dikirin. Loma têkliyên wî bi rêveberiya gelek welatên Ewropayê re hebû. Gelek caran sefîrê Norwec, Swêd serdana wî li Qamişlo dikirin. Her weha ji ber van nêrînên xwe ji aliyê hêzên terorîst û rejîma Sûrî ya hevkar wek hedef hatibû nîşandan…

Şêx Maşuqê kurd û kurê malbata Xeznewî ya li seranserî Kurdistana mezin navdar e( lê ya dûrî siyaset û kurdeweriyê ye jî) di hemû çalakiyên kurdên binxetê de beşdar dibû. Di dema serhildana 12‘ê Adara 2004 an de, ew bi eba û şaşika xwe li nava hezarên ciwanên kurdan digeriya û banga berxwedan û azadiyê li wan dikir. Li şîna şehîd Ferhad, ew ciwanê ku ji aliyê hêzên ewlekariya Sûriyê ve hate kuştin, axaftinên cegeryane dikirin ku heya niha tu kesî ji tevgera kurd ya siyasî nekirine. Di merasîma bîranîna şehîdên azadiya Kurdistanê û di şahiyên Newrozê de bejna Şêx Maşûq ya zirav dihat xuyakirin û bi ala rengîn ya li dora sukra wî pêçayî, bi ayetên berxwedan û serhildanê diqîriya.
Dema hatibû cem me ROJ Tv yê û me pê re çend hevdîtin kirin, me ji nêz ve ev mirov nas kir. Yekser wê demê min ji xwe re got, ev mirovên wiha her sed salî carekê peyda dibin. Weha Şêx Maşûq wêrek û bi qeder û emrê xwedê bawer bû. Ji me re digot "Hûn ciwanên Kurdistanê ne, gelê we bindest û hejar e. Hûn jî li vir li Ewropayê ne, pêwendiyên xwe bi her kesî re xurt bikin, bixwînin û kar bikin. Çavên hemû kurdan li we ye, baş bizanibin".

Şêx Maşûq, şehîdê Netewa Kurd, ji aliyê hêzên tarî yên ku gelek simbolên guherînê li herêmê kuştine, hate şehîdkirin. Berî wî jî Selîm Izzaldîn, Serokê Meclîsa Birêveberiyê demî ya Iraqê û Refîq Herîrî Serokwezîrê Lubnanê û Serokê Partiya Komunîst ya Lubnanê Georg Hawî, rojnamevan Cibran Tiwênî, rojnemevan Semîr Qesîr ji aliyê kujerên Şêx ve hatibûn kuştin. Tenê ji ber ku doza guhertinê dikirin.

Kurd dibêjin berxê nêr ji kêrê re ye. Wiha xwîna mezinekî wek Şêx Maşûq wê bibe nîşana azadiya gelê kurd û guhertina mezin ya ku dê textê hemû qatilan birûxîne, peyda bike…


tariqhemo@hotmail.com