Hevgirtina Rewşenbîrên Kurdên Rojava li Derve di navbera helwestên siyasî û rewşenbîrî de
Şêrwan Îbrahîm

Hevgirtina Rewşenbîrên Kurdên Rojava li Derve, saziyeke rewşenbîrî û serencama serîhildana 12ê adara 2004ê ye.
Ez bawer im ku pêwîstiya gelê kurd bi vê saziyê hebû û hêjî pê heye.
Ez herweha bawer im ku HRKRD îro di çarçeweya ragihandina rojavayê Kurdistanê de, di rêza malpera rojava,net de, karekî berbiçav û hêja dike.
Lê dîsa jî gerek e HRKRD helwestên xwe yên siyasî û rewşenbîrî têkel neke û bikaribe wan ji hev cihê bike.
Di kongireya duwemîn a HRKRD de, guftûgoya derbarê navê dezgehê bi qasî 3 seetan dirêj kir.
Ez jî digel hunermend Birader wek mêvan li wir bûm. Em giş ji gengeşeya wan betilîn.
Ji ber rêya me dûr bû û karê min jî hebû, ez mecbûr mam dawiya wê guftûgoyê nebînim, lê bi rê de ez di rewşa wan de difikirîm û diêşiyam, wek ê ku xema her tiştî dixwe. Min divîbû ku xelk xwedî lê derkevin û endamên wê pirtir bikin û rewşa wê ya aborî jî tekûztir bikin. Min ji xwe re digot ka em çawa dikarin alîkariya vê dezgehê bikin?
Em çawa dikarin wê tekûztir bikin?
Di civîna HRKRD de, hindek heval navê min ji bo endametiya dezgehê pêşniyar dikin, lê hêja Merwan Osman li dij radiweste û diyar dike ku helwesta Merwan pir hişk e û dikare ziyanê bigihîne saziyê.
Gelo rewşenbîrî çi ye?
Dema ku ez bi rewşenbîran bihisim û xwe nêzîk wan bibînim, çima ne rewşenbîr im?
Dema ku ji rewşenbîran hez bikim û bixwazim alîkariya wan bikim, dema ku hergav ji bo xizmeta wan amade bim û hewl bidim ku dezgeha wan biparêzim, gelo çima ne rewşenbîr im?
Ma pêwîst e ku ez jî wek hinekan xwe li nivîsandinê bikim bela û pirtûkekê çap bikim an jî, ji internêtê çend gotaran ji xwe re bidizim hetanî ku bibim nivîskar an helbestvan û paşê endamê HRKRD-yê?
Di malpera rojava.net de tê nivîsandin ku her kes berpirsê naveroka nivîsa xwe ye, yanî di warê belavkirina gotaran de, ti carî, rojava.net nabe alîgira vê naverokê yan ya din.
Berî demekê, min xwest derbarê konfiransa Brukselê daxuyaniyekê belav bikim.
Min nêrîn û helwesta xwe diyar kir û min ji rojava.net re şand daku belav bikin.
Xwedê heye, birêz Merwan Osman ji min re got baş e Şêrwan serçavan em ê daxuyaniya te belav bikin.
Piştî kurtedemkê, birêz Merwan Osman bixwe telefonî min kir û got Şêrwan li qisûrê menêre yaho weleh em daxuyaniyê belav nakin!
Min jî got de hûn dizanin ka ez ê ji xwe re li xwedî xêrekî bigerim belkî bi xêra miriyên xwe ji min re belav bike. Ez bawer im gelekan ew daxuyanî xwendin.
Bawer im jî min bêbextî li ti kesî nekiribû û min ti kes jî di daxuyaniya xwe-ligorî prensîbên rojava.net- neêşandibû.
Min helwesta xwe nivîsandibû û va anuha piştî konfiransê hemî nêrînên min rast derketin an na?
Îca anuha ji xwe re dibêjim: gelo ma ne pêwîst e yê rewşenbîr berî her kesî rewşa miletê xwe fam bike?
Ma rojava.net li helwesteke rewşenbîrî digere yan dixwaze xelkê razî bike û kesî nexeyidîne?
Gelo ma çê dibe yê rewşenbîr ji rastiyê bitirse yan divê rastgo û cegerdar be?
Gelo di vê qonaxa dîrokî de û di vê xirecira rojavayê Kurdistanê de, dê ji bilî van rewşenbîran kî li pêşberî dîrokê û nifşên pêşerojê berpirs be?
Di baweriya min de, dema ku hêja Merwan Osman daxuyaniya min xwend, bi çavê siyasetmedarekî xwend. Lewra jî belav nekir, ez jî wî mafî didim birêz M. Osman. Lê min dixwest ku hêja Merwan Osman daxuyaniya min bi çavê rewşenbîrekî bixwîne daku helwest berfirehtir bibe û berjewendiyên netewî ku armancên rewşenbîran ne di ser hemî berjewendiyên siyasî yên teng re werin girtin.
Ez vê yekê dibêjim daku rojava.net karê xwe yê ragihandinê berfirehtir bike û ez bawer im ger xwe ji hindek kêmasiyan rizgar bike, dê di demeke pir nêzik de bibe navenda ragihandina giştî ya Rojava.
Ez bi reza xwe çûm konfiransê Emerîkayê, li wir, hem partiyên siyasî û hem jî kurdên serbixwe li ser hindek xalan li hev kirin û hindek encam bi dest xistin. Di baweriya min de ger Şêrko Ebas li wan xal û peymanan xwedî derketa, belkî tiştekî baş ji bo kurdên Rojava bihata damezirandin, min helwestên xwe di wê çarçeweyê de derbirîn, deng û wêneyên beşdarên konfirasê li ba min in, her kes dikare nakokî û tiştên ku paşê li paş berdeyan çêbûne, ji xwe re nas bike.
Min jî xwest bêdeng nemînim û wek kurdekî helwesta xwe ragihînim û beşekî ji rastiyê ji miletê xwe re bibêjim.
Gelek tiştên din hene ku dixwazim belav bikim, lê ger wek rojava.net be, jixwe ez nema dikarim tiştekî belav bikim.
Hêja Merwan Osman ma ne te ji me re digot gerek em rastiyê ji miletê xwe re bibêjin, me bi ya te kir, me jî hewl da em rastiyê bibêjin ha!!
Ma ne te ji me re digot gerek em helwesta xwe eşkere û bêtirs bibêjin ha! Îca anuha wexta ku em hewl didin, çima tu rê li ber me digirî?
Ez van gotinan dibêjim lê dîsa jî baweriya min bi we û HRKRD mezin e.
Ez ê hergav piştgiriya wê bikim û destekê bidim we, ez dixwazim gazinên xwe û tişta di dilê xwe de ji were bibêjim.