|
Da ku kurd tevî şerê şîyî û suniyan nebin!
Tariq Hemo
tarihemo@hotmail.com
Li Iraqê asta şerê şîyî û suniyan her ku diçe
bilind dibe. Hijmara kuştiyan di navbera herdo
aliyan de zêde dibe. Li Bexdayê her roj bi dehan
kes têne kuştin. Mirovên bê sûc li ser nasnamê û
nav têne kuştin, kesên navên wan "Omer" be li
ser destê tîmên qetilkirinê yên artêşa El-Mahdî
têne tesfiye kirin. Kesên bi navê "Elî" jî, ji
aliyê çekdarên sunî û şervanên biyanî yên
girêdaye rêxistina El –Qaîdayê têne serjê kirin.
Ji 80% bûyerên kuştin û serbirrînê li tevahiyan
Iraqê li Bexdayê diqewimin. Niha Bexda bûye 2
beş. Yek yê şîyîan, ku sunî bi awayekî
sîstematîn jê têne koçberkirin û yek beşê
suniyan e, ku şîyî bi awayekî sîstematîk ji wir
têne qewirandin. Li taxa "Azemiyê" ya sunî,
kesên şîyî newêrin eşkere nasnameya xwe diyar
bikin. Her weha li taxa "El-Sadirê" ya şîyî,
kesên sunî newêre nasnameya xwe ya mezhebî bilî
bikin, ji ber ku dê serê wan bi birekê bê
jêkirin.
Ev rastiya Bexda û Iraqê ye. Doh dema "goftûgo"
di perlemana Iraqê de çêbû, Serokwezîr Nûrî
Malikî eşkere perlemantoyekî sunî bi "piştgirtia
çekdarên El-Qaîdayê" tewanbar kir. Malkî got, "belgeh
li cem min hene, ku te beşdarî 120 kar û
çalakiyên terorîstî bûye". Weha diyar e, ku
xwediyê malê û diz bi hev û din hisyane. Ne
mumikine, ku sunî û şîyî li hev bên û bi hev re
welatekî demokrat ava bikin. Jixwe berê jî û bi
dirêjahiya dîkokê nekrarîbûn bibin yek û
hevkariyekê ava bikin.
Beriya çend rojan (Kongeriyê Mezhebên Islamê) li
paytexta Qeterê El-Dewha yê pêk hat. Kongreyê ku
qaşo ji bo "nêzîkbûna tevahiya mezhebên ola
islamê tev digere" bi şer û nakokiyên balkêş bi
dawî bû. Herdo aliyan şîyî û suniyan dîsa hev û
din tewanbar kirin û "kampaniya jiholrakirinê"
ya li dijî hev, şermezar kirin. Oldarên sunî
aliyê şîyî bi "qirkirina suniyên Iraqê" tewanber
kir û ew mîna "alavên tahlûke yên meleyên
Tehranê" bi lêv kir.
Qiralê Saûdî Arabistanê Abdulah kurê Abdulazîz
jî diyar kir, ku ewê heya dawiyê li himberî
kampaniya "şîyîkirina" welatên ereban têbikoşin.
Abdulah da zanîn, ku "piraniya misilmanan sûnî
ne û ewê zû bi zû vê baweriya xwe neguherînin".
Medya ereb jî kampaniyek dijwar dajo, armanc jê
ew e, ku şîyîan û suniyan li himberî hev sor
bike û "xetera projeyê Iranê" ji ereban re
şîrove bike.!
Şîyîî û sunî ne tenê li Iraqê hatine himberî hev,
lê li tevahiya cîhana ereb û misilman niha
dijatiyek şîyî û sunyan heye. Hin kes dixwazin
kurdan jî li Iraqê bikşînin nva vî şerê qirêj.
Dixwazin ku kurd jî bibin terfek di vê prosesa
xwînrijîne de. Beriya çend rojan oldarên sunî
yên navdar şêx Yûsif Qerdawî( ku yek ji serkêşê
tevgera islama siyasî di tevahiya cîhanê de ye)
bang li kurdan kir, ku "hewl bidin, şerê sunî û
şîyîan rawistînin".
Qerdawî yê ku dema kurd li Helebçe û Enfalê de
dihatin qirkirin dengê xwe nedikir, niha ji
kurdan dixwaze ku bibin navbênçiyê şerê "xwekuştinê"
yê şîyî û sunyan.
Jixwe beriya demekê jî û ji bo bêtir bala DYA yê
bikşînin ser xwe, kurdên başûr 700 pêşmerge
şandibûn Bexdayê. Li himberî rapora Baker –
Hamilton ya antîkurd, hikûmeta herema başûrê
Kurdistanê û ji bo rêviberiya Bush razî bike, bi
sedan pêşmerge şandibû herema şer ya şîyî û
suniyan li Bexdayê.
Ev gavek ne di cihê xwe de bû. Aramnca sereke ji
aliyê neyarên kurdan, bi taybetî dewleta tirk,
iran û sûriyê ew e, ku kurd jî tevî vî şerî
bibin û ciwanên kurdan jî her roj bi dehan bêne
tesfiyekirin. Niha li Kerkûkê jî hêzên terorîstî
kurd kirin hedef û her roj teqemeniyan li dijî
sivîlan li taxên kurdan pêk tînin.
Navbênkariya kurdan, heger hebe jî, nikare şerê
sunî û şîyîan rawestîne. Ev şerekî dîrokî ye.
Dûr û dirêj e û destê gelek aliyan di gurkirina
wî de heye. Ya baş ew e, ku kurd xwe bicivînin
ser hev. Nêzî hev bibin û baweriya xwe bi hev
bînin, da ku karibin Kerkûk û ezmûneya başûr, li
gel şoreşa hemdem ya bakur, biparêzin….
li gel Yeni Ozgur Politika
de tê belav kirin
|
