Li Rojhilatê Kurdistanê serhildanên Gelê Kurd li hember teror û xwînrêjiya dewletê berdewam in. Hêz û ragihandina kurdî sist e.

Daxuyaniya Partî Demokratî Kurdistanî - Sûriye
----------------------

Rojhilatê Kurdistanê bikin goristana sîstema têrorî ya Iranê

Bi dehan sal e, sîstema têrorî ya Iranê li rojhilatê Kurdistanê ramiyariyek nijadperest û reşkirina mezhebî li hember gelê me yê Kurd bi rê ve dibe. Bi kuştin, darvekirin, îşkencekirin û çavtirsandinê bizava vemirandina agirê hişyariya neteweyî ya gelê me dike û bi taybetî di va dema dawî da bi hemî şêweyên hovîtiya xwe di her warekî da hêrişa xwe digudîne, da rabûna gelê me bitepisîne. Sîstema Iranê ya hovbaz baş dizane, ku ev serhildana dawî pêşgavek e bo serhildana hemî netewe yên Iranê û teviya hêzên azadîxwazên welêt. Lew re jî sîstema meleyên, ku xwe weku nûnerên Xwedê dibînin, amade ye bi her terzekî hovbaziyê hêriş ser gelê me bike, da deselatiya wan a xûnrêj ji dest wan neçe.

Bêguman gelê Kurd, ê ku bi sedan sal e bo azadiya xwe û bo mafên xwe yên neteweyî têkoşînê dike, amade ye di vê rêyê da hîn bêtir goriyan bide, ji ber ku ev sîstema kevneperest hîç ne li gel diyalogê û berhevhatinê ye û hebûna gelê me û mafên wî yên neteweyî napejirîne.

Di va dema dawî da, paş gelek karên hovane û îşkencekirinê yên ji aliyê karmendên sîstemê ve hatîne kirin, nema gelê me bêdeng dimîne, û dest bi rêveçûnên aştiyane kir, û bajarên kurdî rabûn ser pêyan. lê mixabin, dewleta xûnrêj li hember va serhildana gelî hovbaziya xwe tûjtir kir û hartir bû. Gelek mirov girtin, îçkence bi wan kirin, an jî darve kirin.

Rêveçûnên aştiyane pir çavêd sîstemê ditirsînin ji ber ku ew rêya roxandina sîstema şah bû û rêya tunekirina gelek sîstemên din ên welatên sosyalîst ên berê. Lê tiştê balkêş ewe, ku neteweyên din ên Iranê di va rewşa raperîna gelî da xwe nalivînin û nayên hawara gelê Kurd, weku ewan kêşeya demokratiyê, mafên mirov û azadiyên ramyraî ne giring dibînin.

Ji aliyekî dî ve, ji ber lişt û berjewendiyên wan ên petrolî bi Iranê re, van welatên europî jî, yên xwe weku hilgirên azadî û demokratiyê didin xuyakirin, bêdeng mane û bangeşîniya "mediya"europî pir bi ser vê yekê da naçe.

Mixabin, hêz û bangeşîniya kurdî jî baş bi histobariya xwe ya rojnamevanî, mirovî û neteweyî ranabin.

Em di Partî Demokratî Kurdistanî Sûriye da, van rawestanên sist li hember sîstema xûnrêj a Iranê rexne û riswa dikin.

Em ji hemî hêzên neteweya Kurd li her parçeyekî Kurdistanê dixwazin, ku bo piştvaniya gelê xwe li rojhilatê Kurdistanê çi kêmaniyê nekin, tev bi hev re, yek dest û yek dar bin, bi teviya kanînên xwe li gel hêzên neteweyî û demokratên rojhilatê Kurdistanê bin, da sîstema xûnrêj a têrorî li Iranê bizane, ku gava ew kuşterên "Hizbullah" ji Lubnanê tîne nav Kurdistanê, wê Kurd ji parçeyên dî yên Kurdistanê jî bên hawara birayêd xwe. Ji neteweya Kurd tê xwastin, ku em gelê xwe di vê serhildanê bi tenê nehêlin. Bila em rojhilatê Kurdistanê bikin goristana sîstema têrorî ya Iranê

Li rojhilatê Kurdistanê Serbilindî û rûmet bo serhildana gelê me

Serxûzî û binvebûn bo sîstema têrorî ya Iranê

27.07.2005

Komîtiya birêvebir a

Partî Demokratî Kurdistanî - Sûriye