Qehwa sibehê
Diyarî Fatima Savcî
Heman min dikir ji te re binvîsim, çiya di
bin giraniya dilê xwe de ji ĥeyl diketin.
Pilingên Qendîlê bê nalîn li çavên cîhanê û
aliyên wê yên mirî nanerin, ne bendewarin û
berfê tajon Adarê. Gur ketiye zeviyên me,
gur.
- Ji xewnên te yên zîvîn re, noş.
Were em peyala şevê û vî zimanê cengene
hildin birînan.
Dîsa were, em ji birînên xwe vî zimanê
cengene hînî gul û ken bikin.
Em dîsa peyala şevê û birînan hilidin
helbestê, û ziman bi xwe re gêêêêêêêj bikin,
belkî xeribiya me were ser hişê xwe -
Tu zanî li pala çiyê, pêşmerge di kela dilê
xwe de bê hedanên? Jibîr nekirine konên reva
milîonî. Heman ev bûn, pilingên Qendîlê yên
ked û dilên xwe li ser zendên xwe bezandin
hewara di bê xewdîtiyê de dixeniqî. Jibîr
nekirne ha, tenê aliyan rêyên wan di moranê
de şaş kirine.
- Mirin li van deran hesan e, pelên li ser
serê van xelikan xewnên, hesan dihilgurin.
Ne mişit û pîvane wextê mirinê, tenê mirin
e.
Lale ji laşên min dirijin derya, lê dîsa jî,
mirin li van deran hesan e û xewin, hesan
dihilgurin -
Çirayên Qendîlê diçirisin. Berfa bêbav davên
xwe yên sû li ber tiliyên wan vedane. Germa
dilê me nikare davan bide paş, ne jî peyvên
me dikarin kolanên Turkiya hilkutin. Ne Amed
tenê diya wan e!!
-Ez jî wek te destê avê berdim, berav
wêneyên min dişeliqîne.
Gola Nêrsiz têde hij xwe kirî di van deran
re neburiye. Çîrokên nîvşewitî rupelên xwe
dixwin, derewa Sîmirê hidî nema dibêjin -
Ana didu ji daxwiyaniyên başiqe yên
rewşenbîran giheştin min. yek dibêje: em
cîrana xwe Tirkiya vexwendî danûstandina bi
rêjîma Iraqê re dikin di gel tevlîbûna
desthilatiya Kudistanê. Em tevahiya aliyên
vî şerî vexwendî rêzgirtina çareseriyên
hemdemî û dîmuqratî û rêzgirtina mafên
mirovan dikin.
Ya din dibêje: em weku rewşenbîr ji serok
Celal Telebanî dixwazin ku vexwendina rêjîma
Tirkî ji bo seredanê qebûl neke, ji ber ev
vexwendin di nerîna me de kêmkirine ji
kesayetiya wî re û heqaretkirine ji hebûna
miletê kurd re. Em piştgiriya xwe ya bê merc
ji serhildaneke miletî re li dijî hêzên
tirkî li başurê Kurdistanê didin xwiya kirin
û di heman wext de em bi serokatiya partiya
karkerên kurdistanê( PKK) re disekinin di
guhaztina şer ber bi kurahiya Tirkiya de, û
ji tevahiya milet dixwazin ku di tevahiya
bakurê kurdistanê de bi serhildanê rabe.
Ez kîjan daxwiyaniyê emze bikim Fatîma?
Heger min emze kir dê ev daxwiyaniya
emzekirî bi kude were şandin? Kî dê lê
binere û guh bidêyê? Emza min dê berfê bide
paş û aliyan veke û kela dilê pêşmergeyan
bigehîne hewara çirayên Qendîlê ?
-Di birîna xwe de girêdayî, kirasê xerîbiyê
min di xwê de dipêçe. Mirin li ber dilê min
e.
Dê çawe bêjim rojê: roj baş? -
