Tilurkên derya di golan de li sihka diya xwe digerin. Min basik nînin ji banî ve xerîbiya xwe bipîvim.
Melûl li deravên welatê serbestî, wekhevî, rêzgirtin û kar, daxên giyanê xwe mist didim.

Ez keça çanda di bin simên zordestiyê de dinale û hîn pesnên xwe bi mêraniyê dide

Keça kultura ku derguşa min bi lorîkên heskirinê mezin dike û bi zendeke qayîm heskeran dikuje.

Malxwêya mîratê şoreşên bê jimar im û jibermaya heman şoreşên bi bêbextiya kurdan wêran bûyîn.

Keça zimanekî me ku “ Soraniyên “ wî, kurmancên tîpên latînî dûv û heskerên tirkan dibînin û “ kurmancên “ wî soraniyên tîpên erebî dûv û heskiriyên ereban dibînin. Zimanê me ji me bihtir e!? heya em xwe bi xwe layîqê wî nabînin û terxanî miletên din dikin.

Keça partiyên kurdî, yên belavokên xwe yên şermezarkirin û nehaştbûna xwe li ber kirinên rêjîmê, durî rêjîmê, tenê li nav kurdan û bizimanê rêjîmê belav dikin.
Partiyên kurdî yên xwe dijberê rêjîmê û parêzvanên kêşa kurdî didin naskirin û serbest û naskirî li Surî dijîn. Siyasetmedar û rewşenbîrên ku ji Uropa bi dilê xwe diçin Sûrî û tên !!!???
Siyastmedar û rewşenbîrên ku wekheviya jin û mêran ji her jinên cîhanê û kurdistanê re dixwazin ji bilî jinên malbata xwe !!!??? mêraniya wan têrê nake ku bêjin em dijî wekheviyê ne, ne jî têrê dike ku li malbata xwe bipejirînin.

Ez keça çanda girî me, ku lehîstikvanên pênusê li hêviya tifaqekê ne da li bin konê malperan rûnên û li kaba xwe bixin bê ku bizanên “ Siwaro” bistirînin.

Malperên malbat û êlên hemdemî!!!!!!!!!!!!
Wêneyên xwedêdana zarokên berpirsiyarê malperê li tenişta şehîdên îşkenca rêjîmê de diweşînin. Miriyên mirina xudê mezintir ji qirkirna miletekî dişopînin. Malperên ji xwe re mere.

Malperên wêneyên moman, gulan, nûçeyên malbatî, hewaran û saloganan.

Ez keça diya xwe me, keça tembiya tirs û şermî û gunehiyê.
Dema dikenim ji kenê xwe fedî dikim. Dema dimeşim li dora xwe nanerim. Dema xortek li bara min disekine çavsoriyan didimê.

Li welatê serbestî, wekhevî, rêzgirtin û kar, sihika min nîne.
Ez bi xwe sihik im.


Sibeha we yek rû