Azadiya Welat


ŞAM - Hunermendê kurd Guro li galerî El-seyid a hunerî li Şamê rêzetabloyên xwe yên nû pêşkêşî hunerhezan kir. Ji ber ku navê pêşangehê bi kurdî bû ji aliyê çapemeniya Suriyeyê ve rastî boykotê hat .
Şêwekar Guro sêyemîn pêşangeha tekane ya bi navê “Guro” li Şamê li dar xist. Şêwekar pêşangeha yekemîn di sala 1995’an de bi navê “Guro û havîna şewitî”, ya duyemîn di sala 2005’an de bi navê “Gul Guro” û pêşangeha sêyemîn bi navê “Gulana Guro” li dar xist. Her wiha li hundir û li derveyî Sûriyeyê tevli zêdetirî 20 pêşangehên hunerî bûye. Hunermend Guro ji Kurdên Sûriyê yên bênasname ye, lewre nikare derkeve derveyê Sûriyê. Guro li ser vê yekê wisa dibêje: “dikarin mafê nasnamê ji min bistînin, lê nikarin giyana tablo û hunera min ji min bistînin. Tabloyên min, nasnama min in. Ew ji dêvla min li nav welatan digerin”.
Şêwekar Guro naveke kurdî ji pêşangeha xwe re hilbijart û navê xwe û yê bêşangeha xwe li afîş û karta vexwendina pêşangehê xist. Ev bû sedema ku rojnameyên fermî yên Sûriyê nûçeya vê pêşangehê boykot bikin. Li ser vê kiryara nijadperstan Guro wiha axivî: “Ez ê bimînim Guro, û ev pêşangeh dê navê xwe neguhere da ku hinek nijadperestan razî bike. “
Dema mirov derbasî “tirba Guro” dibe, mirov çi bibîne û çi nebîne, ku tijî tabloyên gulan e û bi taybetî gulên berbirojê. Kêm caran mirov dibîne ku “Guro” dikene. Jiyana wî tev xemgînî û reşbînî ye. Cilên wî tim reş in. Tarîbûn û sî di tabloyên wî de bala mirov dikişîne. Erê navê wî

‘Guro’ ye, lê dilê wî yê çûkan e.
Tabloyê “Guro”, mijarên xwe, tev ji xwezaya Kurdistanê û Gundê wî û êş û azarên gelê kurd distînin. Ango, hunera Guro, mirêla xwezaya Kurdistanê û êş û zilm û zora li ser gelê kurd dide nîşandan. Û hêjayî gotinê ye ku Guro di nava hunermendên Sûriyeyê yên kurd û ereb de bi stîla xwe ya taybet hatiye naskirin û gelek xelat wergirtine. Xwesteka wî heye ku pêşangehên xwe li seranserî bajarên Kurdistanê bigerîne. Lê ji ber ku paseport û nasnameya Sûriyeyê li ba wî tune nikare vê hêviyê pêk bîne.
Hunermed Guro li Başûrê Rojavayê Kurdistanê sala 1964’an, li gundê Sefer ku girêdayî bajarê Dirbêsiyê ye hatiye dinê. Guro zaroktî û xortaniya xwe di navbera gundê xwe û Dibêsiyê de derbas kiriye. Têkiliya wê bi hunera şêwekarî, ji qûnaxa zarokatiyê û dema dibistana bingehîn dest pê dike. Guro li ser vê demê wiha axivî: “Dema ez zarok bûm, min alîkariya bavê xwe di karê heriyê û birîna kelpîçan de dikir. Ji wê çaxê û ta niha, têkiliya min a bi xwezaya gund, gul û berberojê wê, teyr û tilûr û ajalên wê, qurnefîl û binevş û sosinên wê qut nebûye. Çavkaniya hunera min û xeyalên min zarokatiya min e.”