Günter Grass

Servedana rastiyê di “hilîskirina pîvazan“ de


Cankurd

Niviskarê alman ê mezin Günter Grass ê ku sala 1999 xelata Nobel ya wêjevaniyê li Stockholmê standiye, û wek tiliya ber bi rastiyê ve di civata almanî de hatibû naskirin, paş 61 salan ji tevabûna cenga cîhanî ya duwê û têkçûna sîstema Naziyan, di pirtûka xwe ya nû de „Hilîskirina pîvazan“ de dide zanîn, ku ew endamekî hêzên SS bû. Hêzên SS wek kujerên milyonan ji mirovan hatine tawanbar kirin.

Ev nûçe wek bombeyekê di nav civata rewşenbîrî û ramyarî ya almanî de deng da. Gelek kesan, wek sereka Encumena Navendî ya Cihûyan Charlotte Knaubloch, rawêşkarê almanî yê berê Dr. Helmut Kohl, cîgerê rawêşkara niho Franz Müntefering (SPD), wezîrê dewletê yê çandeyê Bern Neuman (CDU), serekê partiya polonî (PiS) ya ku niha di deselatdariyê de ye Jacek Kurski û gelek rojname, televizyon û kovarên ronakbîrî li ser vê yekê axivîn û bi tevayî dipirsin; bo çi Günter Grass ê, ku wek morlaparêzekî mezin dihat nasîn, ta niha ser rastiyê peçinî bû û bo çi di pîriya xwe de (79 salî ye) vê yekê niha dibêje. Ji ber ku Günter Grass hemwelatiyê rûmetê yê bajêrê Danzig e li Poloniya, wê niha rûmetdariyê ser ji nû ve jê bistînin. Polonî dibêjin:“ Nabe endamekî berê yê leşkerên SS ê nazî, ku cenga cîhanî ya duwê bi bombebarankirina Danzig dest pêkiriye, bibe hemwelatiyê rûmetê yê vî bajêrî.“

Günter Grass ê ku ji ber van rexneyan pir diêşe, dibêje, ku hinek hene dixwazin wî wek „hîçekî“ an „ne kes“ biçûk bikin, û hîvî dike, ku ev rexnegir êdî pirtûka wî carekê hûr û kûr bixwînin.