Şerê Tehran û Şamê li Beyrûtê!.
Tariq Hemo


Rejîmên Sûriye û Iran insyatifa şer pêşvexistin û bi riya rêxistina Hizbulahê Lobnan careke din kirin qada şer û pevçûnan.

Ji bo Dewletên Yekbûye yên Amerikayê (DYA) û tevahiya Rojava rawestînin û gefên li dij Tehran û Şamê ji destpêkê ve asteng bikin, herdo rejîman rêxstina Hizbulahê bi ser Israîlê ve şandin.

Hemû kes dizane, ku Hizbulah çek û finansa xwe ji Sûriye û Iranê werdigre û ew ji bo pêkanîna armancên van herdo welatan her tim amede ye. Bi êrîşa li ser nuqteya eskerî ya Israîlê, ku di encamê de 8 eskerên Israîlî hatin kuştin û 22 jî birîndar bûn û 2 jî hatin girtin, Hizbulah derî li pêşiya şerekî giran û demdirêj vekir.

Biraya şer û "lempeya kesik" ji Şam û Tehranê derçû. Ev biryar bi êrîşên milîsên rêxsitina Hemasê li dijî eskerên Israîlî û revandina eskerekî Israîlî, hate bi hêz kirin. Serokê buroya siyasî ya rêxistina Hemasê ya ku niha hikûmeta Filistînê bi rêve dibe, li Şamê û di konfransek çapemenî de eşkere biraya şer da.

Xalid Meşel diyar kir, ku ewên asta tekoşîna li dijî Israîl bilind bikin. Hesen Nesralah jî serokê Hizbulahê ji aliyê xwe ve hemleya "sonda rasteqîn" da destpêkirin û da zanîn, ku ewê êrîşên bi rokêtan li dijî bajar û bajarokên hundurê Israîl ranewestînin, heger hikûmeta serokwezîr Eyhûd Olmert bi sedan girtiyên Hizbulah û Hemasê ji girtîgehên israîlê serbest bernde.

Heya niha di êrîşa artêşa Israîlê de li ser birayagehên Hizbulahê li başûrê Lobnanê bi sedan alîger û endamên Hizbulahê hatine kuştin. Her weha di van êrîşan de jî gelek kesên sivîl û bê sûc bûne qurbaniya vî şerî. Belafirên şer yên Israîlê li gelek Sazî, Pir, Fabrik û cihên din ên eleqedarî aborî û torîzma Lobnanê daye. Her roj bi qasî 100 milyon dolar xisara lobnanê dibe. Lê her dîsa Hizbulah êrîşên rokêtan li ser bajarên Israîlê ranawsetîne.

Hizbulah bê ku destûra hikûmet û birêveberiya Beyrûtê bistîne ev êrîş kir û şer da destpêkirirn. Niha jî doza berxwedan û tekoşînê li gelê Lobnanê dike. Ji bilî şerê ku ew ji dêvla Şam û Tehranê li dijî Israîlê bi rêve dibe,ku bi sedan lobnanî heta niha bûne qurbanî, ew doza berxwedanê li gelê Lobnanê jî dike.

Aliyên siyasî yên Lobnanê jî hemû ji hev belav in. Serokê Durziyên Lobanê welîd Canpolat eşker got, ev şer şerê Şam û Tehranê li Beyrûtê ye û tu sûda Lobnanê tê de nîn e. Hêzên xirstyanan jî heman helwestê digrin…

Hizbulah biryara şer ji Şam û Tehranê wergirt û şerê ku divyabû Şam li himberî Israîlê bike, da ku 'Golanê' vegerîne û Tehran jî li himberî DYA û Rojava bike, da ku programê Nuklerê biparêze, Hizbulahê kir û Lobanan kir qada şerekî mezin û demdirêj.

Ev yek jî dê gelê Lobanê li derdora Hizbulahê bide aliyekî û derbeyek siyasî, tevî ya eskerî, li projeyê vê rêxistinê bixe…



tariqhemo@hotmail.com



Ev nivîs di rojnameya Yeni Ozgurpolitika yê de hatiye belav kirin.