|
Rojhilata Navîn ya "kevin"
li ber têkçûnê ye!
Tariq Hemo
Li gorî çavkaniyên cûr bi cûr amedekariya eskerî
ya Dewletên Yekbûyî yên Amerîkayê DYA li dijî
Iranê gihîştîye asta herî bilind û dawî. Di vê
hefteya derbasbûyî de ji aliyê gelek çavkaniyên
çapemeniyê hate ragihandin, ku pîlana derbeyek
eskerî li dijî Nuqteyên Geşkirina Nuklerê li
Iranê kemilîye û (Pentagon) li hêviya wê yekê ye,
ku biryara êrîşê ji devê Georg Bush bi xwe
derkeve.
Li gorî govara (The New Yorker) ya ku
rojnamevanê amerêkî Sîmor Hersh rêvibirya wê
dike, artêşa DYA pîlana lêdana Iranê amede
kiriye û di maweya 24 satan de dê bi sedan
belafir ji gemiyên li Kendava Erebî( Farisî)
bifirin û tevhaiya Nuqteyên Programa Nuklerê ya
meleyên Tehranê têk bibin.
Hersh dibêje, DYA hemû ihtîmal daye ber çavê xwe.
Reaksiyona Iranê dê çi be, li Iraq û Lubnanê dê
helwesta alîgreên Iranê bi çi rengî be?. Ev hemû
tişt, hesab jê re hatiye kirin.
Serkêşê derbeya muhtemel ya li dijî Iranê Cîgerê
Serokê DYA yê yê niha û Wezîrê Parastinê yê dema
şerê kendavê yê 2 mîn, Dick Cheney ye. Li gorî
çavkaniyên pêbawer, Cheney Bush û birêvebirya
Amerîka ye qanih kiriye, ku pêwîste rejîma Iranê
ji holê bê rakirin û rê li ber bidesxistina
Tehranê ya çekên nuklerî bê girtin. Niha Cheney
li welatên Kendava Erebî yeko yek digere, da ku
alîkariya wan li dijî Tehranê gerntî bike.
Hemû Navendên Lêkolînên Stratîjî li DYA û
Israîlê weha bawer dikin, ku derbeya li dijî
Iranê tenê bûye pirsgrêka demê. Ew 100% pêkan e,
eger Mele mîna serkêşiya Kûriya Bakur neke, û
hemû kartên xwe radestî DYA ye neke, derbe dê
pêk bê.
Jixwe Konseya Ewlekariya Navnetewî jî derfeta ku
dabû Tehranê bi dawî kir û tevahiya meselê xist
qonaxa ambargoyê.
Li ser vê yekê jî hemû dewletên mezin, di nav de
Rûsiya û Chîn jî, xwedî heman helwest in.
Eger Iran wek rejîm birûxe, navnendek ji
navendên terora navnetewî têk diçe. Ew sîstema
neadil ya ku herema rojhilata navîn li ser
hatiye damezrandin, dê serobino bibe. Di serî de
gelê kurd dê derfeta xwe idarekirinê bi dest
bixe. Dê Rojhilatê Kurdistanê xwe ji bindestiya
meleyan rizgar bike û bikaribe rewşek serbixwe
bi dest bixe. Ev yek jî dibe destkeftinek
stratîjî ji bo tevahiya neteweya kurd.
Ji ber hindê gelekî girîng e, ku destekek xurt
ji bo Partiya Jiyana Azad ya Kurdistanê PJAK
were dayin. Pêwîste niha Tevgera Azadiya
Kurdistanê PJAK ê bi hêz bike û derxe ser sehna
siyaseta heremê, wek lîstikvanekî bi hêz li
pêşberî hemû aliyan.
Bi derbeya li dijî Iranê, dê rejîma Şamê jî qels
û lawaz bibe. Rêxistina Hizbulah dê têk here.
Çavkaniyên alîkariya çalakiyên wê û Hemasa
filistînê dê bimiçiqe. Rêxistinên Şîy li Iraqê
dê ji holê bêne rakirin. Bi gotineke din ji 90%
pirsgrêkên heremê wê çareser bibin.
Wilo dixuye, ku armanca derbeya DYA ya bêt, ne
tenê têkbirina Nuqteyên Nuklera Iranê ye. Lê her
weha têkbirin û jiholrakirina rejîmê bi xwe ye.
Ev yek jî dê tevahiya terazûbûna heremê
biguherîne û herema Rojhilata Navîn ya kevin têk
bibe…
tariqhemo@hotmail.com
*Ev nivîs li gel rojnameya Yeni Ozgur Politikayê
tê weşandin.
|
