|
Nama Hevkariya mal û komeleyên Êzîdiyan li ser
bûyera Şêxan
Ji bo:
Serkomarê Îraqa fedral birêz Celal Talebanî
Serokê herêma Kurdistanê birêz Mesûd Berzanî
Serokê perlemana Kurdisanê birêz Ednan Miftî
Serokê hikumeta Kurdisanê birêz Nêçîrvan Berzanî
Silav û rêz
Hevkariya mal û komeleyên Êzîdiyan li Elmaniya (
HEVKARÎ ) ku ji 11 saziyan pêk tê li roja
20.02.2007 civîneke awarte li Bingehê Komela
Kaniya Sipî ya reweşinbîrî û komelayetî li
Almaniya bajarê Bielefeld sebaret rewşa bajarê
Şêxan û deverên din yên Êzîdiyan li başûrê
Kurdistanê li darxist.
Em van bûyeran weke komployekê li dijî Kurdên
Êzîdî û werara prosêsa dîmukratiyê û mafên
mirovan li başûrê Kurdistanê li qelem didin.
Her weha neyarên Kudran, hêzên radîkal û
nedîmukratîxwaz bi vê yekê dixwestin ku
duberkiyekê têxînin navbera gelê Kurd û
Kudistaniyan.
Kurdistan mozayîka Netew û Ola ya, û ji kevin de
weke dergûşa aşîtî û mirovayetiyê ye, lê mixabin
Êzîdî di dîroka xwe de tûjî gelek komkujî,
karesat û malwêraniyê hatine pir Ferman bi serê
vê Ola Kurdî ya resen hatine, tevî ku ev Ferman
û komkujî bi navê Olê bûne, lê tevaya van
komkujî û fermanan, di koka xwe de ji boy
binbirkirin û nehiştina ziman û kultûra Kurdî
hatine li darxistin.
Şewitandina Peristgeh û ciyên pîroz û sembolîk û
êrîşên li ser rêberên Êzîdiyan ne ji valahiyekê
tê.
Li gorî dîtina me ev kiriyarên wisa ji demek
dirêj ve ji aliyên neyarên Kurdan ve tên pilan
kirin, û bi vê kiriyarê xwestin ku ewlekarî û
bihevrejiyana gelan li Kurdistanê û Iraqê
têxînin di metirsiyeka mezin de.
Lê weke her car Êzîdiyan bi sebir û zanebûna xwe
ev pilan û projekteyên bi qirêj pûç derxistin.
Parastina hindikayiyan û di nav de parastina
Êzîdiyan li başûrê Kurdistanê erkê ser milê
hikumeta herêma Kurdistanê ye, û hilgirtina vî
barî berpirsiyariyeke dîrokîye.
Eger hikumeta herêma Kurdistanê vê rewşê bi
şêweyekî cidî, bilez û berpirsane çareser neke
em wek Hevkariya Mel û Komeleyên Êzîdiyan bi
gumanin ku ev yek ji bin kontrola me jî derkeve,
û dibe ku hin tiştên ku em jî naxwazin derkevin
holê.
Di wê dema ku em berjewendiya neteweyî û nirxên
Olî didin ber çavan, me hindek daxwaz hene:
1- Bi cî anîna benda 140 ya destûrê Îraqê
bişêweyekî wek hev û yeksan li tevaya deverên
Kurdistanê.
2- Komîteyek ji bo şopandin û çavdêriya vê
bûyerê ji 5 kesan ji ( Hevkariye ) hate
damezirandin û ev komîte piştî vexwendineke
fermî ji bal hikumeta herêma Kurdisanê wê
serdana ciyê buyerê bike.
3- Ew kesên ku bi van kiriyarên hovane rabûna
gereke bên bin çav kirin û bi serperiştiya
komîteyek bê alî û serbixwe pêşkêşî dadgehê
bibin.
4- Pêwîst e Wezareta karûbarên Ayînî ya hikumeta
herêma Kurdistanê bi daxuyaniyeke fermî Ola
Êzîdiyan weke Ol qebûl bike, û Peristgeh û ciyên
din yên pîroz yên Êzîdiyan weke ciyên pîroz li
kurdistanê qebûl bike û ji hêrişên teroristan
bên parastin.
5- Pêwîste hikumeta herêma Kurdistanê bi
şêweyekî yasayî Êzîdiyan piştrast bike ku êdî
nema Êzîdî bi egera nasnameya Olî tûjî karesatên
wisa dibin.
6- Pêwiste hikûmeta herêma Kurdistanê bi
daxuyaniyek fermi xemsarî û kêmûkasiya
damûdezgehên desthilatdar li devera Şêxan qebûl
bike; û berpirsên wê deverê pêşkêşî dadgehek
taybet bike.
Hevkariya Mal û Komelên Êzîdiyan li Elmanya
1- Yekîtiya ciwanên Şerfedîn li Solingen
2- Mala Êzîdiyan li Oldenburg
3- Mala Êzîdiyan li Berlin
4- Mala Êzîdiyan li Kalkar
5- Mala Êzîdiyan li Weissel
6- Mala Êzîdiyan li Emerich
7- Mala Êzîdiyan li Celle
8- Mala Êzîdiyan li Leer
9- Pilattforma Êzîdiyên Cell PEC
10- Bingeha Êzîdiyan li dervayî welat
11- Komela Kaniya Sipî ya rewşenbîrî û civakî
Almanya Bielefeld 20.02.2007
|
