Daxûyaniya Tevgera Rastiya Kurdistan – Sûriyê, Rêxistina Ewropa


Li gor daxûyaniya damezrandina Tevgera Rastiya Kurdistan – Sûriyê, pir endamên berpirsyar, kadêr û endamên din ji partiya “ Yekîtiya Dêmokrata Kurd li Sûriyê “ rêxistina Ewropa û herweha jî kesayetiyên kurdî, siyasî, rewşenbîrî, zanistî serbixwe, yên ku baweriyên xwe bi xebatê ji bo vejîna projeya me ya netewî li Kurdistana Sûriyê dikin, piştvaniyên xwe ji rêzaniya “ Tevgera Rastiya Kurdistan “ dan xûyakirin û xwe ji karên rêxistinê re amade kirin. Di roja 17. 06. 2006 an de, di bin siyên van xalên jêrîn de konfiransa damezrandina “ Tevgera Rastiya Kurdistan – Sûriyê “, rêxistina Ewropa li bajarê Bottrop ê li Elmanya li darket:

* Dêmokratî ji bo Sûriyê li gor lihevkirina hemu gel û kêmnetewên din, pêwîst e ewanan di welêt de wek aliyên hevbeş bi hev re berdewam bikin.
* Xwerêvebiriya siyasî ji navçeyên Kurdistanî re li Sûriyê.
* Yekbûna peyv û banga siyasî di çarçewa hevkariyên rêxistinî û li ser bingeha rêzgirtin ji rastî û heyina me ya Kurdistanî re.
* Hêzkirina pêwendiyên birayetiya Kurdistanî bi hêzên siyasî li beşên Kurdistanî din re.
* Baştir e, ku diyalog di nav şaristanan de peyda bibin, û ewanan bi hev re hevbendiyan ava bikin, û ne li dijî hev şer bikin.
* Divê em sûdê ji kanîn û serpêhatiyên gel, dewletên herêmê û cîhanê bigrin û çarçewa hevalên gelê xwe berferehtir bikin.
* Divê rola jina Kurdistanî mîna hevalbendeke rasteqînî di jiyana me, bi taybetî yên rêzanî û komeyatî de were çespabdin.
* Em pêşwaziyê li her kesê, ku bi dilsozî dixwaze pêvajoka me ya bizavî dewlemend bike, dikin.

Piştî ku bixêrhatina hevalan hat kirin, konfiransê karên xwe bi kêlîkê bêdengî li ser giyanên pakrewanan û di serên wan de, yên serhildala Avdara pîroz, di 2004 an de dest pê kir. Herweha komîta rêvebira konfiransê hat hilbijartin, û herdu nameyên birêz Norî Birîmo gotebêjê “ Tevgera rastiya Kurdistan – Sûriyê “ ji aliyên hevalan de hatin xwendin. Dîsan Dr. Ebdil Mecîd Şêxo ( endamê polît bîro yê katî ) bi kurtî siyaseta îroyîn ya cîhanî, herêmî, sûrî û Kurdistanê di ber çavan re derbaz kir û herweha ewî bi kurtebirî serdedemên avakirina “ Tevgera rastiya Kurdistan “ armancên wê ji beşdaran re diyar kir. Dîsan danûstandinek dêmokrat di navberên beşdaran de peyda bû, hevalên beşdar kanî bûn bi azadî, bi berpirsyartî nirîn û peşniyazên xwe di konfiransê de pêşkês bikirana. Dr. Ebdil Mecîd Şêxo li nik hemu pirsan, têbîniyan û rexnan bi awakî birayetî rawestiya, û di encamê de xalên siyasî û rêxistnî pir giring berhem dan.
Dîsan di vir de herdu pirojeyên bernamên siyasî û rêxistinî yên T. R. K - S û hin belgeyên din li hevalan hatin belavkirin, û paşê jî encumena rêvebira rêxistina Ewropa û di nav wan de xanimek û berpirsiyarê rêxistinê li Ewropa hatin hilbijartin. Piştî vê jî hin encumenên pêşeyî hatin hilbijartin 1- Encumena têkiliyên dervayî. 2- Encumena têkiliyên Kurdistanî. 3- Encumena karûbarê civakî. 4- Encumena darayî. 5- Encumena rêvebiriya malpera T. R. K - S.
Herweha jî hevalên beşdar piştvanî û dilsoziyên xwe ji gelê me û çalakvanên tevgera me re di hundir Kurdistanê de diyar kirin û ewanan daxwaziya vexwendina pişikdarên me yên dêmokrat li Sûriyê ji bo hevpeyvîn û lihevkirinê kirin, dengên xwe ji bo serbestkirina girtiyên siyasî yên Kurd û hemu girtiyên nirînên azad li welêt bilind bikin.
Silav û rêz ji hemu pakrewanên serbestiya gelan û dêmokratîkirina welatan re hatin şandin û ewnan spasiyên xwe, ji layêngirên mafên mirovan û gelan re li cîhanê pêşkêş kirin û li dawiyê Dr. E. M. Şêxo spasiya hemu beşdaran; encumena birêvebir, encumenên din kir û serkewtinên mezin ji wan re hêvî kir. Li aliyê din jî, hevalên beşdar soz dan, ku ewanan qaserî kanin dê xebatên xwe li rex rêxistinên Tevgera Rastiya Kurdistan li hundir Kurdistana Sûriyê û li dervayî wê bi jîrbûn berdewam bikin.

20. 06. 2006
Tevgera Rastiya Kurdistan – Sûriyê
Rêxistina Ewropa