Termê xav

Aso Elîka

Li qiraxa vî dilî
Termê evîna neqşok,
Bê ewlebûn hilgirim
Reh hişk e wek pûş
Te gêre bikim
Bidêrim li ber bayê vê payizê,
Tu bibî ka û kapik
Li ser tirabêlka vî canî,
Te bi gorî bêhna pehîzokê bikim
Û berdim bêhna te yî tîr ji qorzîka vî gewdeyê herifî
tu hilperikî bû xwîna min î lerizî
ez te li nav mayînên vî welatê bêkêr belav bikim,
di hişkaya te de hilma barûdê biçînim,
te derxim meydana her bajarî…
li te bicivînim siyên giran, te bikin pîşo li ser birînên vî giyanî.

Tu şekirê ristok bû, li ser lêva min tu dilopa tenahiyê bû,
di çavê min de rondika şahiyê bû,
lê tu îro meşka zuha , cilmisî ye, bi stûna nig şkestî ve bi darvekiriye,
êdî hew…hew…hew te dinoşim tu jiyana stewr e lê…