Ez li wê derê me li ser sînga wê birînê
kûr berdidim qurmên xwe
dar im diyar im di arê xwe de xwelî di xweliya xwe de aj didim her bihar
diteqim bişkov bi bişkov di tava rondikên xwe de keskesor im di awirên ewrên xwe de brûsk im vedidim!berq im diteqim!
ez li wê derê me! Li ser sînga wê birînê!
kevir im, lat im, zinar im zarên zemên dizingilim li bedana min mîx, stûn, birc, şkêr, şkeft diaxivin
ez li wê derê me! Li ser sînga wê birînê! Xwîna xwedayên serhildêr di perengên çêv de dikelin difûrin!
ez li wê derê me! Li ser sînga wê birînê! ku li gorî gotinên ji devê luleyên cemed di devê asmîn û laleyan de tê pifkirin,''ne tu der'' im
ez li wê derê me! Li ser sînga wê birînê! ku her êvar çira çîrokê lê tê vêxistin ku her êvar di stareya stêran de stran tên strîn bo starê bi hêviya dawî lêanîna ronoyan bi hêviya anîna roşengan rorengan
ez li wê derê me! Li ser sînga wê birînê! dibilim, dilorim, dilîlînim! lîr im dilîrim qîr
im diqîrim deng im diderizim
ji asoyan, siya çend çelengan ji cenga evînê re çak
hoooooo! Ez li wê derê me! Li ser sînga wê birînê!