Marwan Ohman

Di van rojên dawîn de, nexasim piştî vekêşana Israîl ji Xeza û bi helkeftina civînên 60 saliya UN; dewletên ereban, bi gelemperî, berî didin avakirina têkiliyên eşkere û legal bi Israîl re, li ser ku bêhtirînê wan, ji berê de, xwedî têkiliyên veşartî û ne eşkere bûn, wek Qeter, Behrên, Tunis û HTD û vegeryana têl û peywendiyên germ di navbera dewletên ku berê peywendiyên fermî yên wan bi Israîl re hebûn; wek Urdin û Mesir. Ev yek , bi rewanî derbas dibe, bê ku guhdaneke ragihandinê berfireh , di media erebî de , li ser were kirin. Wek ku guhdana li ser têkiliyên Pakistan bi Israîl re hate kirin , li ser têkiliyên dewletên ereban yên nû bi Israîl re, ne hate kirin !?

Ji Pakistan tê xwestin ku ji bo piştgiriya ereban hemberî israîl, divê têkiliyan bi Israîl re veneke lê ereb ne xem e û gerek e, ji bo berjeweniyên xwe û bo mana rêjîmên xwe yên dijmirov û dijdem , têkiliyan bi Israîl re avabikin û wan têkiliyan germ bikin. Divê Pakistan û yên wek wê dijminê dijminê ereban bin, lê ne xem e ku ereb dostên dijminên Pakistan bin, wek nimûne têkiliyên hemû dewletên ereban yên fermî û gelêrî bi Hindistanê re, dijmina dîrokî ya Pakistan

Gelo gava ji dewletek wek Pakistan, sebixwe, dûr û hêzdar, weha tê xwestin ku bejewendiyên xwe bin pê bike ji bo biraderên xwe yên ereb yên musilman , lê biraderê wê yên ereb û musilman ji mafê xwe dibînin ku ew bi xwe têkiliyan bi kes û dewletên ku ji xeynî xwe dixwazin avanekin avabikin.

Gelo ji miletekî ku hîn çarenûsa wî ne di dest wî de ye û di nav lepên rêjîmên ereb yên dijmirov de dijî( gotina dijî di nav kevanan de, ji ber ku tê qirkirin û tunekirin nayê jiyandin) mîna miletê Kurd, da wê çi jê were xwestin ????
Gava ku Kurd yan hin ji berpirsên kurdan bi van peywendî û têkiliyan bi Israîl re bana; sed di sedî de, wê bi dehên programên TV ên ereb û sedên gotar û nivîsan bi hatine amadekirin , bo şermezarkirina van têkiliyan û pirotestokirina wan û wê bihata gotin :“Ev kes dijminên neteweya ereb in û kêr û xincer in di newqa neteweya erebî de ne.“

Ne ji mêj ve ye ku hin ji berpirsên Misrê ya ku peywendiyên wê yên fermî bi Israîl re hene û ala dewleta Israîl li ser gelek devran ji „Alqahîre“ hildayî ye digotin : Kurdistana Iraq a azad têkilî û peywendiyan bi Israîl re avadike û Kurdisan bû ye cîgeh û buhira ajansên Israîlî, di Iraqê de.

Ne ji mêj ve ye ku bi sedên gotaran, di alavên ragihandina erebî de, hatin weşandin, li ser têkiliyên di navbera şorişên kurdî û Israîl de.

Bi rastî tiştekî seyr û cihê matmayînê ye, ev helwestên berevajî yên gelek kesayetiyên ereb yên siyasetmedar, rewşenbîr û ragihêner, ji xeynî ereban dixwazin ku ereb bin ji ereban bêhtir.

Dema ku ez vê yekê dibêjim, ne ku ez doza avakirina têkiliyan, di navbera Kurd û Israîl de dikim lê mebesta min ku ev hevdijiya di navbera ewan hizr û bîrên ku ev helwest ji wan dertên bidim xuyakirin. Li ser ku berjewendiyên neteweyî ew in ên ku dibin bingeh û zemîn bo avakirin an ne avakirina têkiliyan, di her warî de, di navbera du kesan an du hêzan an bi geleperî, di navbera du aliyan de.

22/09/2005