KURDIYA MIN

Jîr DILOVAN 

jirdilovan@web.de

Kurdiya min 

Zarê zêrîn

şana devê min

Deryaya bê binî

Rêya min a bê dawî

Tu

Lorîka diya min

Jîn û jiyana bav û kalê min

Xwîna laşê min

Çav û gav

Mêjî

Hizr û ramana min

Bi te radizim

Radibim bi te

Bi te ye girî û şîna min

Û şahiya min bi te ye

Kurdî ya min

Zarê min 

şana hingivîn

Bi te ye strana min

Dîlok û govenda min

Qîr û hawara min

Bi te ye bi te

Bi te ye sond û peymana min

Hêrs û berza min

Gula baxçeyê min

Bihar bi te ye

Bihara min

Bi te şîn tên 

Nêrgiz

şîlan

Berfîn û beybûn

Bi te reng didin

Kesk û sor û zer

Bi te dihile roja min

Heyva min bi te

Û bi te diçirisînin

Stêrên ezmanê min

Tu ne bûyaî

Kî bû Ehmedê Xanî

Çi bû Mem Zîn çi bû

Kê nas dikir Meleyê Cizîrî

Feqiyê Teyran

Elî Herîrî

Nalî û Qedrîcan

Îro jî

Bi te diherike Dîcle

Ferad bi te pêlan dide 

Û bi te dijwar e Xabûr

Bi te bilindin Cûdî û Gabar

Bi te geş in

Amed

Dêrsim

Amediyê û Mehabad

Bi te ye navê Kurd

Kurdistan bi te

Îro 

Winda ye axa min

Xalî ye dîrok

Bin lingan de ye 

Çanda min

Tu tenê maye

Kurdî ya min

Diya min

Evîna min

Çêbûm bi te

Bi te dimirim