Paş xwe helalkirin û xwe çengî dojeha ku buhiştê binav dikin kirin, ku bi bijîvaniya xwînperestan, bi bijîvaniya rêbazên ne mirovane, ku xwe di şûna firîşteyan de, li vê gerdûna bê bînahî, rayên kevneperestiya xwe bi wî rengê cihêwaz daçikandin e.
Êdî bi berhevdana min paş ragihandina hindek berpirsyarên fêrmî, ku 3000 mal li Şingalê herivtin e. Anku bi kêmasî zêdeyî 6000 mirovên bê guneh li çolên bê xwedî, di himbêza dûpişk û maran de, li kêleka tîbûn, birçîbûn û sermayê de, bi dengvedanên qîrîn û birînên biçûkan, di bin çend konên rizyayî de, ku ew kon jî, ta hindek radeyên bê xwedîtiyê, bi dest hindekan ji wan nakevin, bê mal, û bê sitûn in.

Belê zêdeyî 6000 ÊZÎDÎ, 6000 KURD, bûne cangoriyên wê reseniya xwe, ku serpereştî li dûv serpereştî cenga xweparastin radestî asoyên renge reng dikirin û dikin.
Di çarçoveya van 6000 qurbanên wan asoyan de, dixwazim wate û têgeha vê hejmarê şîrove bikim.
Dema ku em herivtina 3000 mal berbiçav bikin, em dê pêrgî hevbeşî û hevbendiya herdû hejmaran werin.
Di gerdiş û têgeha malbatan de, nemaze di gerdişa Kurdan de, her mal bi kêmasî xwedî 2, 3-4 zarok in. Di nav Kurdan de hejmareke pirr kêm heye ku xwedî tenê 2 zarok in.
Li vir dixwazim analîze bikim ku li Şingalê zêdeyî 6000 Kurd ta vê kêlîkê bê mal in, anku ew 3000 mal bi kêmasî xwedî malbateke ku ji 2-4 mirovan hebûn. Îro ew 3000 mal tev herivtine, tev li çolan duwa û reseniya xwe bi rêve dibin..
Êdî jixwe hejmara kuştiyan hejmareke seyr û matmayî ye.
Di ragihandina lêkolîna dawî de, di derbarê şehîdan de, ta vê kêlîkê zêdyî 800 cangorî, û 380 birîndar hene, ku Helebçe û Anfaleke diduwan dikare wisa hesan xwe li qelemê bix e.
Dema ku em kiriyareke wisa, anku bobelateke wisa ji hizir, hest û berhevdanên xwe re biterxînin, anku bi kûrmijûliyeke erkane bihizrin, bê guman meriv wê bi rengekî awtomatîkane, xwe bi xal, alav û qad û panava çare û alîkariyê mijûl bike. Jixwe tolhildan tiştekî dî ye, tu kesî dabaşa tolhildanê naniye holê, û tevlîhev e.
Ev stûbara sereke pêdiviye û pêdivîbû ku xwe li hest, raman, berpirsyarî, û dema desthilatdariya herêma Kurdistanê bûba, ji bilî komelgeha Kurd, her çiqas ku hêja ne li gor destûra madeya 140î de bûn, û ew dorhêl ne bi ser herêma Kurdistanê ve bûn.
Lê aya Şingal çi komelgeh e, ku wisa hesan pêrgî xwedîlêderketin û sexbêriyê ne hatin??
Pileya ku Şingal lê rawestiye, dikare xwe li germaya berhevdanên arîşeyên rojane ku rû didin têkel bibe??
Di wan rojên hestyar de, anku rojên xwîn, birçîbûn, qîrîn û beravêtî de, desthilatdariya herêma Kurdistanê tenê 300 pêşmerge ji bo parastina 350 000 Kurdan hinartin.
Di dengvedana vê hejmarê de, sawêrekî wisa tijî ji xirş û çewtî xwe li wêneyên min pêçan, û wisa ji wî sawêrê min re rave kirin ku ji sedî sed ev hejmar wê tevlîheviyek, yan jî şaşiyek xwezayî ya bişkokên kombiyoter be, û dibe ku xudanê wê nûçe-ragihandinê nîneke jibîr kiribe, û di şûna 3000, ewî 300 nivîsandibe.
Lê paş ragihandinên pir alî rêyalîteya ku wêne, sawêr û raman û hêviyên min naxwaztibûn pêrgî werin, pêşberî hûrdanînên min ve hatin, û mixabin tu xirş û çewtî li ba wî sawêr û wêneyên min nebû. Ew tenê hizirekî tirsnak ku qet naxwest rêyalîteyê berbiçav bike bû.
Ta niha tevaya Kurdan bi gelemperî, ew cangoriyên xwe, „heke ku em xwe ne xapînîn“ çend dergehên derbend û çend asoyên telezge ji ser serê wan de wergerandin???
Rast e, çend xwepêşandan, çend nerazîbûn, û çend helwest-diyarkirin hatin holê. Lê ma ev xelata şîna wan seranser e? „Ta hindek radeyan“
Ta niha 40 meliyon Kurd, nemaze peyv bilindên Kurd, li benda çend hawar û lavlavan, çend xwe di bextkirin, çend biryar, çend imze û çend Babe Şêxên din in, da ku stûbara rasteqîne ji dîroka Kurdewariye, ji radestiyên dubarekirî re bi nav bike???
Ma ev dîrok wê sitûna xwe bi kîjan sirûdê, bi kîjan lehengiyê daçikîne, da ku belgeyên hevjînbûn, belgeyên wekheviyê, ji peşerojê re rêz bike û xwe li ber pirîstên xêrnexwaz yên pêşerojên pir bigire??
Ma ev zagonên har û dîn, yên firîşteyan e, ku her pêngav li ser dîroka me bên çespandin, yan ben û dergehê van zagonan di destên ademîzadên dilxwestinên takekesane de ne??
Ma pêwiste ku dîrok herdem dubare bibe, da ku tovên lehengan şaxên xwe vedin, û bibin cangoriyên sereke, û qada cegerdariyê ku têr ji ezmûnan raberî newêrekên Kurdiya xwe bikin, yên ku bi hesanî nav û neteweya xwe radestî duruşmeyên Alah û Ekber kirin??
Aya hûn dixwazin ku ev serdem, bibe têkbirina dîrokeke sor û ya dawî, da ku hûn Kurdatiyê bi serê xwe ve kin, û xwe bikin pêşew û serdarên tolhildanê, û wisa hesan tov û biniyada reseniya ku li ser rûpela ye, ber bi deriya berjewendî û Olî ve beherikînin???

De dezgeyên xwe yên xêrwaziyê berpêş bikin, û bi hezarên dolaran diyarî gundan bikin, û 240 textên din yên reş û 4800 pakêtên tebeşîran diyarî xwendingehan bikin!! Û Şingal??!
De Medya cîtiyiyên xwe ava bikin! Û Şingal??!
De xwe bi bazirganiya bihîstokên LG mijûl bikin!! Û Şingal??
De piroje û supermaktên ava bikin! Û Şingal??!
De kazînoyan li Silêmaniyê û bajarên din ava bikin, û nave Vitaly Kouznetzov li wan bikin!! Û ŞINGAL ???



22. 09. 07 Elmaniya
Cegersoz@hotmail.de