Tiştê em jê ditirsyan, qewimî. Terorîstan êrîşek mezin, ku wek “Mezintrîn êrîş ji dema rûxandina rejîma Sedamî” hat xuya kirin, li dijî 2 gundên êzîdiyan li herema Şengalê ya başûre Kurdistanê pêk anîn. Bi 4 erebeyên bombebarkirî, terorîstên ereb êrîş birin ser gundên “Til Ezêr” û “Sîba şêx Xidrî” û bi sedan mirovên bê sûc qetil kirin. Li gorî agahiyên herî dawî, derdora 400 kes şehîd ketine û hijmarek mezin jî birîndar hene.

Piraniya van kesan jî zarok û jin in. Hêzên terorê, sozên xwe yê “Pêkanîna komkujiyekê li dijî kurdên êzîdî”, bi cih anîn. Ji dema rûreşiya kuştina wê keca bi navê “Dûwayê” û heya niha, rêxistinên terora islamî êzîdî wek hedef nîşan dane.

Bi vê komkujiyê hemleya xwînhelalkirina êzîdiyan gihîşt asta xwe ya herî bilind. Hîna jî dê ji bo “Dûwayê” tol ji zarok û jinên êzîdiyan bête stendin. Ev komkujî ne ya dawî ye. Êzîdî bi tunekirinê re rû bi rû ne. Hebûna wan li başûr di metresiyek mezin de ye. şingal ji her aliyekî rastî êrîşan tê. Xizanî, nebûna derfetên kar, lîstokên aliyên bi rêxistinên erebên sunî ve girêdayî û niha jî teror…

Madeya 140 î jî ya ku wê çarnûsa şingalê diyar bike cemidî ye. Yek ji armancên terorîstan rê li ber girtina pêkanîna refrandomê bû. Dixwazin êzîdiyan teror bikin û nehêlin dengê xwe bidin madeya 140 û şingal bi ser xaka Kurdistanê ve neyête kêşan. Lîstik mezin e. Armanc ew e, ku êzîdî xwe dûrî Kurdistanê bikin an jî rastî mirinê bên û warê xwe terk bikin û koç bikin. Wek çawa ji bakur reviyan û welatê Xalitka û Deşta Sirûcê ji bawermendê vê olê vala bû, weha dixwazin bînin serê şingalê jî.

Hikûmeta herema başûrê Kurdistanê derbarê êzîdiyan de xemsariyek mezin nîşan da. Ji dema rûxandina rejîma Bexdayê di 2003 an de û heya niha ne di warê siyasî û ne jî di warê aborî de tiştek li şingalê û heremên êzîdiyan kiriye.

Gund û ziviyên kurdên êzîdî hîna di destê erebên Sedam de ne. Kar nîne û xizanî serdest e. ji bo ku rojekê dolarekî bi dest bixin, ciwanên şingalê diçin Bexda û Mûsilê kar dikin û jiyana xwe dixin metrisyê de. Hikûmeta başûr jî projeya bi 800 milyon dolar li navenda Hewlerê ava dike û qayişê bi mîrgeha Dubay dikşîne. Yek proje li şingalê nehatiye ava kirin.

Hêzên pêşmergeyan diçin Bexdayê ji bo erebên sunî biparêzin, lê derdora şingalê berdaye ye û terorîst bêye ku kes wan kontrol bike diçin û tên. Ev komkujiya ku li dijî êzîdiyan pêk hat gerek ya dawî be. Pêwîst e hikûmeta başûr êzîdiyan ji rêxistinên terorê biparêze. Pêwîste êzîdî jî xwe bi çek bikin û gund û heremê xwe biparêzin. Eger xemsariya hikûmeta başûr li himberî êzîdî û feyliyan wilo bimîne û ev her 2 beşên civaka kurd bê parastin û maf be, dê yekîtiya kurdistanî têkeve metrsiyek mezin de.

Pêwîste hikûmet xwedî li hemû kurdan derkeve û heremê wan ava bike û di warê siyasî de jî wekheviyek ber bi çav diyar bike… Rehma xwedê li hemû şehîdên şingal û Kurdistanê be..



tariqhemo@hotmail.com