Enfal, Sedam û berpirsiyariyên din
Selîm Biçûk


21.08.2006, Sedam Husên û hevkarên xwe yên enfalkirin û tevkujiya gelê kurd li pêşiya dadgehê ne. Tawan: Binaxkirin û windakirina 182.000 kurdên sivîl bi saxî, kuştin û şewitandina 5000 jin, zaro û kal û bi hezaran candar û xwezaya kurdistanê bi çekên kêmawî, şewitandina 4500 gundên kurdistanê û berî wê windakirin, kuştin û binaxkirina 8000 kurdên berzanî …!!!
Kujer li pêşiya dadgehê ye lê bîr û ramanên wî serbest, li derve kuştin û talanê dewam dikin. Bi navê Islam û Xwedê serî tên jêkirin, komên mirovan dibin armanca giyanên nexweş ku ji jiyanê tenê dikarin mirin û kuştinê wek pirekê bibînin daku bigihin çavbelek û horiyên bihiştê û nexweşiyên xwe yên giyanî çareser bikin. Li hêla din jî, hîn bangên Baas: „Netewa erebî yek e, xwediya peyamek bêmirin e“ li derveyî dadgehê, pêl dide û ber bi Enfal û Helbçayên nû ve diçe. Ramana nijadperestiya erebî û takedîtina islamî ya ku her dîtinên derveyî xwe gawir û hêjayî kuştinê li qelem dide, yekîtiyek bênîşe ava kirine û dixwazin bibin nûnerên Xwedê li ser zemînê. Bi navê Xwedê kuştin û talan û serjêkirinê rewa dikin. Mirina her kesê ne ereb-misilman helal û zelal e û ew jî bi navê Xwedê.
Seranserî kolana erebî û islamî jî, ragihandin, rewşenbîr û civak di seferberiyê de ne. Ji van bîr û ramanên kujer re dîlana hovîtiyê li dar xistine. Li kolanên Bexdayê kuştina mirovên bêguneh dibe sedema şahî û semawendan û kolan û ekranên erebî bi sema û dîlanê sermest dike. Ji xwe kuştina kurdan ku hevabendên „ Cihûyên bê Xwedê ne“ deriyê bihiştê li ser tanê piştê vedike û horiyên çavbelek bi kom û qeflan pêşwaziyê dikin.
Ev yekîtiya nijadperestiya erebî ku Partiya Baas bi herdu hêlên xwe Sûrî û Îraqî nûneriya wê dikin û ramanên gawirkirinê yên islamî wek bayê mirinê pêl dide û li cihanê belav dibe. Hişk û ter li pêşiya xwe dişewitîne. Zarokên li kolanên Europa û deverên dûr dilîzin gerek e bên kuştin, rêwiyên balefir û tirênan bi kar tînin gerek e bên kuştin, jiyana nûjen û azad gerek e bi tevayî bê kuştin … û bendewarên bihişt û horiyên çavbelek ji xwînê têr nabin û ew jî bi navê Xwedê.
Sedam li pêşiya dadgehê ye, lê pirs, pêwîst e piralî bin. Ne tenê Sedam tawanbar e. Eger dadgeh dûr û dirêj li kujer û berpirsên vê tevkujiyê bigere dê di serî de û pirsa yekem arasteyî cihana islamî û bi taybetî ya erebî bike: Cihê we, di vê tevkujiyê de, li ku bû û niha li ku ye?
Pirsa duyem gerek e arasteyî kurdan bibe: Piştî kuştin û windakirina bi sedhezaran, şwitandina bi hezaran gund, binpêkirina şeref, namûs û rûmeta kurdan û bêdengiya cihana erebî û islamî, cihê we li ku ye? Pirsa sêyem ji civaka cihanî tê kirin, gelo dema we Sedam bi çek û kêmawî dikir, we bawer dikir ku bi wan çekan nêçîra çivîkan bike? Pêwîst e ku bersiva van hersê pirsan bi kurahî bê dan û her aliyek berpirsiyarî û tawanên xwe di vê tevkujiyê de berçav bike. Li ser vê bingehê dadgehkirina Sedam û hevkarên wî dikare rê li pêşberî Enfal û Helebçayên nû bigire û bibe sedema hêminiya gelê kurd. Metirsiya mezin ew e ku nîşan û rêveçûna kolana erebî û islamî bi ragihandin, rewşenbîr û piraniya xelkên xwe ve, berê herêmê û bi taybetî kurdan dide gelek Enfal û Helebçayan. Rewşenbîr û berpirsên cihana ereb û misilman ne tenê li hember van tevkujiyan bêdeng diman, herwiha jê re çepik û lîlan didan û niha ew helwest dewam dike.
Beguman, ti tol û ceza li cihanê nîn e ku têra sûc û tawanên Sedam û hevkarên wî bike. Ne kuştin bes e, ne bidarvekirin û ne jî zindan. Yek tişt tenê dikare giyana qurbaniyên Sedam û xizmên wan vehesîne ew jî, misogerkirina pêşeroja gelê kurd e. Ev pêşeroj bi avakirina civakek hişiyar, jixwebawer û demokrat, li ser bingeha nirxên mirovahî û mafên mirovan tê misogerkirin û ev yek berpirsiyariya hemî gelê kurd e û di serî de berpirsiyarî û hişiyariya pêşeng û rêber û rewşenbîrên kurd e.