|
Kampaniya berhevkirina 100.000 imeze bi dawî bû
DAXUYANÎ
21ê Sibatê roja navnetewî ya zimanê dayîkê,
kampaniya 100. 000 imze bi dawî bû
21ê sibatê roja navnetewî ya zimanê dayîkê ye.
Ev roj her sal li welatên ku endamên UNESCOyê ne
bi çalakîyên pirreng tê pîrozkirin.
Armancên vê rojê ev in:
1. Balkişandina ser mafê perwerdeyîya zimanê
dayîkê
2. Bilindkirina têgihîştina ji bo civakeke
pirçandî
3. Bilindkirina pejirandina li hember mirovên
cihêreng
Dewleta Sûriyê jî endama vê saziyê ye, wê jî
hewldanên navneteweyî yên parastina zimanan û
taybetmendiya gelan pejirandiye û îmze kiriye.
Lê di rastiya xwe de hîn jî bi tundî beşdarî
hewldanên tunekirina zimanê kurdî dibe. Û hemi
rêçen pêşveçûn û geşpêdanê li ber asê dike.
Di vê demê de, dema UNESCO dibêje ku nivê
zimanên vê gerdûnê di gefê û di metirsiya ji
holêrabûn û nemanê de ne, rewşa zimanê me di
hest û hiş û bîr û dilê me bi gurmîneke mezin
diteqe. Û careke din em û tirs rû bi rû li
pêşberî hev radiwestin û em dîsa jî li gorî
derfetên xwe hewl didin ku temenê vî zimanî
dirêjtir bikin û azadiya wî wek erkekî sereke di
têkpşîna xwe ya rewşenbîrî de li qelem bidin.
Ji boyî bi cihkirina erk û pêdiviyên îroyîn yên
tevgera rewşenbîriya kurdî, H.R.K.R.D, di sala
2006ê de, dest bi kampaniya berhevkirina 100.000
imzeyan kiribû. Û bi hemî derfet û karînên xwe
hewl da ku vê kampanyayê bi dawî bike.
Bi vê munasebeta navneteweyî, em dixwazin çend
xalên giring bo raya giştî destnîşan bikin:
1. Hevgirtina Rewşenbîrên Kurdên Rojava li Derve,
bi dilekî germ, bi rêzgirtineke bêhempa spasiyên
xwe pêşkêşî wan leşkerên nenas ên li welêt dike,
yên ku di rewşên pir dijwar û tirsnak de,
dikaribûn bi wêrekî û cegerdar, him imzeyan ji
gund û bajaran berhev bikin û him jî wêneyên wan
imzeyan ji me re bişînin. Em naxwazin navan
destnîşan bikin lê spas ji bo kes û sazî û
dezgehên rewşenbîrî û spas ji bo çend partiyên
siyasî yên ku piştgiriya me kirin.
2. Îro H.R.K.R.D kampaniya ziman bi awakî fermî
bi dawî dike, ji hemî kesan tika dike, ger
formên imzeyan li ba wan mabin, bila bi zûtirîn
kat ji me re bişînin.
3. H.R.K.R.D ji serê sala nû û vir ve di gel
UNESCOyê di hewldanê de ye daku imzeyên
berhevkirî tevî belgenameyekê li ser rewşa
zimanê kurdî radestî wê bike. Aniha jî pirsa
wergirtina imzeyan li ber destê serokê saziyê ye,
hêviya me ew e ku di nêziktirîn wext de bersivek
e erênî bide me.
Em di vê rojê de banga xwe bo rewşenbîr û gelê
xwe dûbare dikin, daku zimanê xwe û nasnameya
hebûna xwe ji hev cuda nekin û her û her ala vê
kurdiyê di hest û mêjiyê xwe de liba bikin.
HRKRD kampaniya berhevkirina 100000 imze bi dawî
anî, lê pirsa ziman di çaçoveya xebata xwe de
pirsa herî sereke digire. Vê pirsê mîna
kampaniyeke vekîrî û bêsînor dê bi awa û şêwazên
nû û cihêreng berdewam bike. Bi armanca
avakirina pirojeyeke netewî bo zimanê kurdî dê
di kar û xebatê de be.
Hevgirtina Rewşenbîrên Kurdên Rojava li Derve
Komîteya kampaniya imzeyan
21. 02. 2007
|
