Partiya Azadî berê wê bi ku de ye?
Salih Kobanî

Berî salekê du partiyên kurdên Sûryayê (Partiya Hevgirtina Gel bi serokatiya Mustefa Cum,a û Partiya Çep a Kurd li Sûryê bi serokatiya Xeyreddîn Mûrad) ji raya giştî re aşkere kirin ko ew bûne yek partî û navê wan bû partiya Azadî. Serokê partiya Azadî bû Xeyreddîn Mûrad lê Mustefa Cum,a û Beşar Emîn bûn endamên serokatiyê.
Berî ko bibin yek partî, gelek guftûgo dibûn di derbarê yekgirtina sê partiyan de (Hevgirtina gel, Çep û Yekîtî) lê yekbûna bi Yekîtî re hinekî li paş ket. Ev yekbûn taqeteke nû da gengeşiya kurdî-kurdî û hêviyên ko gelek hêzên dîtir jî bibin yek geştir bûn.
Berî çêbûna partiya Azadî, birêz Mûrad dest bi gerekê li Europa kir û simîner ji wî re li gelek bajarên europî hatin amadekirin û ne her car pirsên ko ji wî dibûn dilê wî xweş dikirin, ne di warê siyasî de ( zelalkirina wî ji şêweya têkiliyên tevgera kurd bi Sûryê re wek dewlet ne serkeftî bûn) û ne jî di warê malbatî de ( şandina wî ji jin û zarokên xwe bo Nerwîc wek penaber, ne pirs bi dilê wî bû û ne bersîv bi dilê guhdaran bû!).

Demeke kurt piştî aşkerekirina avakirina partiya Azadî, komek ji hevalên Hevgirtina Gel dilnexweşiya xwe diyar kirin û ew jî sîgnala (îşareta) yekem bû ko ew xwarina ko partiya Çep û Hevgirtina Gel bi hev re amade kiribû, kelexavî û bi lez bû, kî ji wan bi lez bû, çima bi lez bû, gelo wan guman nekiribû ko ziyana bi lezûbezê pirê caran ji sûdên wê pirtir in?
Ev pirs û gelek pirsên dî bê bersiv in û wê bimînin vekirî.

1- Piştî aşkerekirina yekbûna herdu partiyan bi demeke kurt diyar bû ko partiya Azadî dido ji endamên komîteya xwe ya navendî ko li Europa dijîn (Rebhan Remedan û M.Reşîd) dane alî, ew herdu birader jî ji Hevgirtina Gel hatibûn!
Wan herdu biraderan daxuyanî derxistin (…) berê bi navê komîteya navendî ya partiya Azadî li Europa û piştre bi navê xwe û dawiya dawiyê li mala xwe rûniştin.

2- Grûpeke dî ji hevalên Hevgirtina gel li welêt diyar kirin ko ew ne razî ne, daxuyanî derxistin û hinek gotin hene ko ew xwe amade dikin herin nav (Alpartî).

3- Berî çend rojan nûçeyeke flaş hate belavkirin ko kongira partiya Azadî bi dawî bû û birêz Xeyreddîn wek sekreterê partiyê hate hilbijartin, ew nûçe kopiya nûçeya ko ji aliyê partiya demokrata pêşverû ve hatibû weşandin, naveroka wê jî ew bû ko berêz Hamîd Derwêş wek sekreter hate hilbijartin!

Ev kultur di nav kurdan de ne kevn e, xwedêgiravî raya giştî ya kurdistanî bi dilê xwe girtiye û li hêviya nûçeya ka kî dibe serokê kijan partiyê ye!

4- Dîsa jî ji medya hate xuyakirin ko gelek ji hevalên partiya Azadî (yên ko ji Hevgirtina Gel hatine) qet hay ji kongirê nebûn û nûçeya lidarxistina kongira Azadî ji internêtê bihîstin!

Ji van çend xalên ko derbas bûn mirov dikare bêje:
- Bisernekeftina çêbûna partiya Azadî dibe asteng li pêş ew hêzên dî ko xwe ji yekbûnê re amade dikirin.
- Berpirsiyariya wê neserkeftinê li ser seroketiya partiya Çep û Hevgirtina Gel e, ew ên ko nuha jî di seroketiya partiya azadî de ne.
- Dilsarbûn û rûniştina kadirên Azadî li malên xwe (yên ko hatin qewtandin, yan cemidandin, û yan jî bi xwe li mala xwe rûniştin li hêviya rojên baş in) ew jî berpirsiyariya seroketiya Azadî ye.
- Ji herkesî re aşkere ye ko dewleta Sûryê naxwaze ko partiyên mezin û xûrt di nav kurdan de hebin û her tecrubê divêt bête beravêtî kirin.
- Gelekî balkêş e ko endamên ne razî ji Hevgirtina van du partiyan herdem ji aliyê Hevgirtina Gel in.
- Partiya Azadî nexwşiyên xwe bincil dike û herkes dizane ko bincilkirina nexweşiyan tucarî nebuye çare û nabe çare.
- Ev yekgirtina ne gelekî serkeftî, nimûneyeke şaş dide hêzên siyasî yên dî û gelekan ji wan çavtirsokî dike.
- Şêweyê birêz Xeyreddîn di kar de (fermanên wî, biryarên xav ko karibûn têkiliyên Azadî xerab bike bi hinek hêzên tevgerê re ji bo sedemên biçûk, pêşdana bercewendiyên şexsî û malbatî li ser bercewendiyên partiya xwe..hwd) gelek pirsan bê bersiv dihêle.
- Bersivên asan ji pirsên ne asan re ne çareseriye (ko ji Azadî tê pirskirin gelo çima gelek hevalê wan li mal rûniştine? Dibêjin: ê yabo herkes yekbûnê naxwaze!!)
- Rast e her yekbûnek divê qurbaniyê wê hebin, lê ma çima hemû qurbanî ji aliyekî ve ne.
- Gelo ev e nimûneya yekgirtina hêzên tevgera me?
- Ev yekgirtin bû, lê partiyekê partiyeke dî xwar û hevalên wê belav belav kirin?