Termên qurbaniyên siyaseta erebkirinê gihîştin herêmê
 

Kesên ku di van demên dawî de ji nêz ve bala xwe didin tiştê bi serê kurdan tê, wê bibînin ku tiştên çêdibin encameke rasterast ji siyaseta erebkirinê ya rêkxer a ku li dijî vî miletî û bi taybetî li vê herêmê tê meşandin e.
Destpêkê em dixwazin rewşa jiyanî ya van qurbaniyan hinekî bidin xuyakirin, piştî lêpirsîna ku me li ser rewşa jiyana wan kiriye, ji me re xuya bû ku piraniya malbetên wan nikarin xwarina xwe ya rojane bidestxînin û ti jêderên wan a jiyanê tune ne ku karibin pê bijîn. Lewma jî neçar mane, wekî piraniya xelkê me li herêma kurdaxê, ku derkevin û herin li bajarekî an jî welatekî din, ew û malbatên xwe, tenê bo berdewamiya jiyanê. Ev sedema siyaseta birçîkirinê ya ku rêjîma navendî ya dagîrker li ser kurdan dimeşîne, tê zanîn ku piraniya van kesan jiyana xwe li navçeya "Deşta Cûmê" derbas dikirin, ew navçeya bi xwe jî dewlemndtirîn navçe li herêma kurdaxê ye.
Ev yek ji siyseta erebkirinê ya nûjen e ya ku li Çiyayê kurdan dimeşe, ew siyaseta ku dixwaze vê herêmê di rêya hinek alavan ji Kudan vala bike, yek ji wan alavan birçîkirina welatiyên resen e, ew jî di rêya rêlibergirtina kar û kontrolkirina aboryia herêma bi rêya nîşteciyên ereb yên ku li herêmê hatine bicîkirin.

Mirina 24 kesan, jin û mêr (termê 24'ê di 7/8/2006' an de gihîşt Cindirêsê ango piştî wê bi du rojan) piraniya wan di temena xortaniyê de ne û birîndarbûn û seqetbûna hinên din jî ji ber evê siyasetê stûxwariyeke bo rêjîm û hikûmeta navendî ya Sûrî ya dagîrker, li vir jî em dixwazin hemî gotinên ku loman ji wan qurbaniyan dikin, red bikin. Ji ber ku ti gunehê wan tun ye ji bilî ku kurd in û ji mafê xwe yê jiyaneke bi rûmet li ser axa xwe hatine verûtkirin, ji lewma jî çûne welatekî dîtir.
Li vir em dixwazin hemî welatî, kes, nivîskar, rêxistin û partiyên ku li rojavayê kurdistanê û bi taybetî li Çiyayê kurdan karê xwe birêve dibin, hişiyar bikin ku haya xwe ji idî'ayên bednavkirinê hebin, ji ber ku ew bi rêya dezgehên ewlekarî, erebên niştecî û kirêgirtiyan li herêmê tên belavkirin,

Hinek Ravekirin :

Şanoya ku bi destên rêjîma şovenîst a dagîrker di dema veşartina termên qurbaniyan de hatiye çêkirin, serê mirovantiyê tev ditewîne. Ji ber ku tiştên di dema veşartinê de di navenda erebkirinê li "Cindirêsê" çêbûne, karekî rêkxer û çêkirî bû . di wê rojê de, şandek ji nûnerên rêjîmê, mezentirîn nûnerên olî (islamî û xiristiyanî) û şandên "Telay'i" û "Şebîbit Al-sawra" (du rêxistinên ciwanan ên partiya al-be'is in) ji bo ku alên partiya Hizbullah û wêneyên rêberê wê Nesirellah hildin, ji bilî wê jî alên Be'is, ên biyan ji herêmê û ji xelkê wê, jî hebûn.
Her termek bi aleke Sûrî yan jî Be'sî hate xemilandin, ev jî bû sedemeke din ku xwediyên wan û welatiyên li wir hîn biêşin, piştre sloganên wek "bijî şehîdên gelê ereb" , "ellah ellah em giş qurbanê Esed û Nesrellah" , "Bijî berxwedana Hizbullah, bişkin plangêr û projeya Rojhilata Navîn a Mezin" û gelek sloganên din hatin avêtin, ew deka ku gotar û slogan li ser dihatin xwendin di bin kontrola dezgehên ewlekariyê de bû, bi hevdengiya al-Be'is û Şêx û melan ve.
Tiştê ku li ser rêxistin û partiyên kurdî tê girtin, ew e ku ti liv û tevger nekirin, tevlî ku dezgehên rêjîmê, Al-Be'is û dezgehên ewlkariyê ev bajarê birîndar "Cindirês", di wê rojê de, kirin bajarek ji şovenîsta erebî re. Dema ku hinek ji endamên Rêxistina /RDEK/ di nav milet de geriyan û hinek pirs li ser razîbûna wan ji vê rewşê re ji wan kirin, hate dîtin ku giş nerazî û ecêbmayî ji partî û rêxistinên kurdî mane ji ber ku ti kesî ji wan ev kar li xwe ne girt, ne jî gotar xwendin û ne jî tiştek din kirin.
Rêjîmê xwest ku goristaneke taybet ji van qurbaniyan re çêke û navê wê piştre bike "Goristana Şehîdan", lewma jî hemî malbet hatin îcbar kirin ku kesên wan yên kuştî di vê goristanê de werin veşartin, lê tenê malbetekê israr kir ku termên her sê zarokên xwe /Reşîd, Hesen, Mistefa/ bibe gundê xwe "Şiketka" yê girêdayî "Raco", ew jî piştî guftugoyeke dirêj bi berpirsên polîs û ewlekaran re yên ku neçar man wan berdin, piştî bala xwe dan ku dibe ev tişt bibe sedema agirpêketinekê.
Tiştê me ne got ewe ku desthilatê pênc kon li navenda bajêr li şûna "Bazarê kevin" vegirtin û ew kon bi alên Al-Be'is, rêjîma navendî û aline biçûk ên Hizbullahê hatin xemilandin, lê xwediyên qurbaniyan jî her yekî ji wan konek li pêşiya mala xwe vegirt, ew jî bû nameyek ji rêjîmê re ku ew ji serxweşiya navendî ne razî ne, ji wê rojê de ti weltiyên kurd li bin konên navendî nehatin dîtin.

Bangek ji hemî welatiyên kurd re :

ji vir û di hundir herêmê de, em bang li hemî welatiyên kurd ji nivîskar, rewşenbîr û hemî hêzên neteweyî yên kurdistanî dikin ku haya wan ji planên di hundir dezgehên rêjîma erebkirinê û dostên wê de di herêma çiyayê kurdan û li derveyî wê tên çêkirin, hebe. Nemaze rêjîm dixwaze sûdê ji vê bûyerê wergire û dest bi şalaweke /himleyeke/ berfireh kiriye bo kurdan bi giştî û malbatên qurbaniyan bi taybetî bigihîne baweriya ku ew kesên jiyana xwe ji dest dane qurbaniyên "Şera Israyilê" ne, ew jî ji bo rastiyê veşêre, lê mixabin hinek ji rêxistinan daxuyanîyin dûrî rastiyê û bê bingeh derxistin, lewma jî em ji hemû cîhanê re misoger dikin ku ew kesên ha bûne qurbaniyên siyaseta birçîkirin û valakirina herêmê ji kurdan, ew siyaseta ku yek ji projeya erebkirina Herêma kurditanê – Sûriyê bi giştî ye, ji lewra em banga xwe arasteyî hemî kesên bi rûmet dikin ku hewl bidin bo :

- Rastkirina nêv ji "Şehîdên şerê Israyilê" bo "Qurbaniyên siyaseta erebkirinê li Çiyayê kurdan" .
- Lidijderkitina plana çêkirina goristanekê bi navê "Goristana Şehîdan" li Cindirêsê .
- Dest bi danezankirina welatiyan ku ev kesên ha koma yekemîn in ji kuştiyên ku bi xwe qurbaniyên rasteqîn ên siyaseta erebkirinê yê ku desthilata navendî ya dagîrker di hundir Çiyayê kurdan de dimeşîne.
- Hêviya me ji hemî kesên bi rûmet ku ew ti daxuyanên dûrî rastiyê dernexin ji ber ku, ta niha, tenê milet dibe qurban.

Di dawiyê de, em serxweşiyê ji gelê xwe li Çiyayê kurdan û bi taybetî ji Cindirêsa birîndar re pêkêş dikin, û hêvîdarin em bi hev re li dijî şalawên erebkirinê rawestin, ew şalawên ku li vê dawiyê çav dane ser vê pinkê ji welatê me .

Têbînî : Tiştê me li jor rave kirine giş bi deng û wêneyên foto li cem me peyda dibin, eger kîjan dezgeh an malper bixwaze em amade ne jê re bi rê kin.



Rêxistina Lidijderketina erebkirina Çiyayê kurdan /Efrîn/
/RDEK/