Li Silêmaniyê dezgeha Xandan weşanê bi zaravê Kurmanciya Jorîn-Latînî jî dike

PUKmedia / Perîşan

Di dema dawî de zimanê kurdî ketiye qûnaxeke zêrîn de, her wuha bi awayekî berfireh di nava gelê kurd de li her çar parçeyên Kurdistanê hatiye çewsandin û bi taybet li Başûrê Kurdistanê (Kurdistana Iraq).

Jiber ku sînor di navbera parçeyên Kurdistanê de hatiye danîn, têkiliyên kurdên her çar parçeyan di hêla çand û keleporê de qels û lawaz bûn û her navçeyek an herêmek bû xwedan taybetmendiyeke cuda ji parçeyên din, çi di warê zarav de, çi di warê çandê de û çi di warê siyasî û aborî de.

Dezgeha Xandan bo Pexş û Weşandinê li Başûrê Kurdistanê ku rojnameya ASO bi zimanê Kurdî (Kurmanciya Jêrîn-Soranî) diweşîne, di malpera xwe ya internet de www.xandan.com , ku ji çar beşan pêk tê (Kurdî – Soranî, kurdî-latînî, Erebî, English) dest bi weşana nûçeyan bi Kurmanciya Jorîn jî kir.

Xandan ku dezgeheka serbixwe ye di hêla ragehandin û çanda kurdî de xebata xwe birêve dibe û ji aliyê birêz Stiran Ebdullah tê birêvebirin, di agahdariya xwe de diyar dike ku mebest ji vê gavê peydakirina pêwendî û têkiliyên çandî di navbera her çar parçeyên Kurdistanê de ye.

Tê zanîn ku nivîsandina Latînî di medya û çapemeniya Başûrê Kurdistanê de roj piştî rojê berfirehtir dibe.

Dezgeha Xandan di agahiya xwe de bang li xwendevan, nivîser, dezgeh û rojnamevanên kurd li her çar parçeyên Kurdistan yên bi tîpê latînî dinivîsin dike ku têkilyên hevbeş di navbera wan de durist bibin û têkiliyên ragehandinî û çandî di navbera wan de bihêztir û baştir bibin.