Li ezmanê Şamê, melevaniya Mosadê…!
Tariq Hemo
tariqhemo@hotmail.com

Belafirên şer yên Israîlê li ser qesra Serokê Sûriyê Beşar Esed ya li bajarê Ladiqiyê firyan. Artêşa Israîlê diyar kir ku wan bi vê yekê xwestine nameyekê bighînin Esed, ew jî" çi dema em bixwazin, em dikarin te tesfiye bikin". Ev liviek simbolîk bû, bi gotinek din, Israîlî nikarin Esed ji ber çend sedemên heremî û navnetewî bikujin, lê wateya vê livê ya herî girînge ew bû, ku hêzên istixbaratê Israîl (Mosad) liv û tevgera Esed dişopînin û dizanin ew di kîjan demê û li kîjan cihî dimîne, ev jî tê wateyê ku ewlekariya Serokê Sûriyê di metirseykê de ye û ew li bin çavdêriya ajanên Israîlê diçe û tê. Ji ber hingê hebûna wî di wê demê di qesra Ladiqiyê de ji aliyê artêşa Israîlê hate kifişkirin..

Ji aliyêkî din ve, li gorî hin çavkaniyên heremî Israîl ji Şamê re eşkere kiriye ku heger eskerê wan Celad Şamot serbest neyê berdan, ew ê êrîşî 40 noqteyên eskerî yên Filistîniyan li Şam û derdorên wê bikin.

Berpirsyarên dewleta Israîlê dibêjin, agahiyên pêbawer li cem me hene, ku biryara revandina eskerê me ji Şamê û di bin çavdêriya Esed bi xwe derketiye. Jixwe berê jî Israîl êrîşek biribû ser gundê (Eyn Alsaheb) yê 25 km dûrî Şamê û ew cih di 5/10/2003 an de bombe kiribû.

Rêjîma Şamê tevî vê tengasiyê jî, hîna siyaseta girtin û binçavkirina kesên muxalifên siyasî berdewam dike.

Bi dehan kesên demokrat ji muxalefeta ereb gitine û ew bi sûcên bêwate û dubarekirî dane ber Dadgeha Ewlekariya Dewletê ya ne yasa. Bi sedan jî ciwanên kurdan hîna di girtîgehên Edra, Heleb, Qamişloyê de ne. Ew bi sûcên"endametiya rêxistinek ne yasa û hewledana parçekirina axa welat" têne tewanbarkirin. Piraniya van ciwanan jî endam an jî alîgerên Partiya Yekîtiya Demokrat PYD ê ne, her weha endam û alîgerên çend rêxistinên din ên kurdan jî hene.

Li milekî din, rêvebirya Şamê komek rewşenbîrên kurd dicivîne ser hev û wan vexwendî hevdîtinekê bi Cîgira Serokê Sûriyê Dr.Necah El- Atar re dike. Babeta hevdîtinê jî, wek di belavoka van rewşenbrîran û di axaftina yekî ji wan bi ROJ tv re hate diyar kirin de, li ser "mafên çandî yên beşên civaka Sûriyê" bû. Wek her car dîsa ji aliyê rêvebiriya Şamê soz hatin dayin ku xwedêgiravî "di nêzîktirîn dem de dê pirs bêne çareserkirin". Jixwe beriya vê hevdîtinê, hevdîtinek din jî hebû, ew jî hevdîtina çend serok û sekreterên partiyên kurdî bi heman berpirsa rejîmê re hebû. Mijara hevdîtinê li ser" dayina hemwelatiya Sûriyê ji bo kesên bê nasname" bû. Dewleta Sûrî ji mêj ve hewl dide ku pirsa gelê kurd li Başûr Rojavayê Kurdistanê bixe çarçoveyek teng û wa mîna "kêmneteweyekê" ji van kêmneteweyên welat li qelemê bide û pirsa netewî ya kurd tenê di "hilgitina nasnameya Sûriyê" de sînor bike û hewla çareserkirina wê bide…

Rejîma Şamê her ku dikeve tengasiyê û cih û derdor lê teng dibe, ber bi kurdan ve dibeze. Lê her li ser siyaseta inkar û paşvexsitina çareseriyê bi israr e.

Hêzên siyasî yên kurd, bi taybetî jî evên ku temsîla wan di nava gel de nîne, li ber van sozan xwe li ba dikin û bawer nakin ku asta hevdîtinan bi berpirsên rejîmê re wilo bilind dibe.. Li şûna ku bi hêzên ewlekariyê re rûnin îca yekser bi Cîgira Serokê Sûriyê re rûdinin. Ev yek jî wan kêfxweş û bextewer dike….