Şam û derdorên wê…
Tariq Hemo
tariqhemo@hotmail.com 

Rejîma Beşar El- Essed di hemleyek berfireh de bi dehan nivîskar û rewşenbîr girtin û bi sûcê "piştgirtiya hêzên derve û antipropagendeya li dijî rejîmê", avêtin zindanan.

Hemleya mijara gotinê, piştî imzakirina van kesan li ser daxuyaniya (Beyrût-Şam) ya ku bi banga "serastkirina têkilyên Sûrî û Lubnanê û ji nûvekêşana sînorê di navbera herdu welatan de", hat belav kirin, pêk hat. Ev hemle heya niha bi binçavkirina bi dehan kesên muxalif encam daye. Niha jî ev kesên girtî, di girtîgeha Edrayê de, li gel bi sedan girtiyên kurd ketine greva birçîbûnê, da ku nerazîbûna xwe nîşan bidin.

Rejîma Şamê, her ku diçe destê xwe li derdora stûkura gelê Sûriyê dişidîne. Tevî rewşa girtin û binçavkirinê ya bi awayekî sîstematîk pêş ve diçe, rewşa xizaniyê jî pir xerab bûye. Ji bilî efser û kesên derdorî Essed û malbata wî 70% ji gelê Sûriyê di bin xeta xizaniyê de dijîn. Hêzên Ewlekariyê jî her roj kesên bê sûc digirin bin çavan û wan bi tewanbariyên cur bi cur davêjin zindanê.
Berî çend rojan Medya Sûrî ragihand, ku wan li navenda Şamê 5 terorîstên islamî kuştine. Li gorî dewleta Sûriyê ev kes ji bo "bombekirina çend dezgeh û saziyên dewletê hatibûn wezîfedarkirin". Ji xwe rejîma Şamê, bi hezaran terorîst ji bo şerê Hêzên Hevpeyman li Iraqê perwerde kirin û ew hinartin heremên sunî yên Iraqê. Loma bingeha hêz û rêxistinên terora islamî niha li Sûrî xurt e û hema terorîst dikin ji bin kontrola dewleta Sûriyê derkevin û berê çekên xwe bidin singa rejîmê..

Ji aliyê din, 16 vê mehê, rapora Sirce Bramirtz ya derbarê lêkolînkirina bûyera kuştina serokwezîrê Lubnanê yê berê Refîq Herîrî de eşkere dibe. Bramirtz rapora xwe li navenda Konseya Ewlekariyê di civînek fermî de derdixe pêşberî cîhanê. Gelek nûçe û şîrove hene, ku ev rapor dê kesên payebilind di rejîma Şamê, di serî de Essed bi xwe, bi kuştina Herîrî tewanbar bike.

Cîgirê Serokê Sûriyê yê berê Abdulhalîm Xadam di hevpeyvînekê bi rojnameyeke ereb de diyar kir, ku rapor wê Essed wek kes bi derçûna biryara kuştina Herîrî sûcdar bike. Xadamê ku niha serkêşiya muxalefeta sunî dike( li gel tevgera Ixwan El Muslimîn) haziriya sazkirina hikûmetêkê li derve dike. Ji wê hindê hewl dide ku piraniya hêzên muxalif ên Sûriyê, çi ereb an jî çi kurd, li derdora xwe bicivîne.

Rejîma Sûriyê tevlihev bûye. Ew di hundur de dest bi hemleya girtina rewşenbîr, nivîskar û hemû kesên muxalif dike, li derve jî têkiliyên xwe bi rejîma terora navnetewî ya Meleyên Tehranê re xurt dike.

Herwiha rêxistina Hizbulahê ya şîiyên Lubnanê jî destek dike. Loma her roj xelek li derdora stûkura wê teng dibe. Tekiliyên bi welatên ereb di serî de Misir û Saûdî Arabistan jî her ku diçe xerab dibin. Ji ber vê yekê gelek çavdêr dibêjin, ev rewşa rejîma Şamê, rewşa rejîma Sadam ya li ber ketinê, beriya çend salan, tîne ber çavên mirov…




* Ev nivîs di rojnameya Özgurpolitikayê de hatiye belav kirin.