Roja 28.05.2006’anda civîna Gruba Xebata Demokratîk ya Netewîya Kurd li Kosarê (Kiziltepe) pêkhat. Û di vê civînê de bi navê Însîyatîfa Partîya Kurdistanê axaftina M.Gazî Daş.
Bi slav û rêz dibêjim hun bi xêrhatin piştî gelek salan li Kosarê civatek wusa germ,ez gelekî keyfxweş im.
Bi îcaza civatê henêk nerînê Însîyatîfê pêşkêş bikim.

Li BAKUR PIRS Û PIRSGIRÊKÊN KURD Û KURDISTANÊ
Tevgera neteweyî ya Bakurê Kurdistanê, ji hebûna rêxistineke Kurdistanî û himbêzkirina Kurdan bêpar e û di nav lêgerîneke sîyasî de ye.
Di çerçeweyeke çawa de meriv dikare çareserîyê bîne rojevê û devjengîyê li ser bike?

Rûpelên realîteyeke nuh ji doza Kurd û Kurdistanê re vebûye. Li alîyekî mercên navneteweyî, şertên objektîf û ji aliyê hundurû ve rûdan û berfirehbînên li Başurê Kurdistanê bayê kurdan bilind kiriye.

Îro bîr û bawerîyên neteweyî yên kurdewarî ji hemî deman bêtir derketine pêş. Ew îdeolojî, bîr û bawerîyên ku destgehê tevgera kurd ji hevde dixist û lawaz dikir nema dikare hespê xwe wekî caran bibezîne.

li Qesra Sipî, di civînên Yekîtîya Neteweyan de, li seranserî Ewrupayê û li welatên cûrbecûr, Kurd bi cilûbergên pêşmerge yên kurdî û bi zimanê Kurdî tên pêşwazî kirin. Li alîyekî Kurdistanê rastîya Dewleta Kurdî, bi awayê Federe di rojeva cîhanê de tê naskirin û wekî caran komkujî û jahrdadana kurdan ji rojevê bi dûr dikeve û Kurd destpêdikin ku li ser axa xwe desthilatdarê civata xwe bin.

Di gel hemi berfirehbûnên pozîtîf yên alîkarîya doza Kurd û Kurdistanê dikin, hin berfirehbûnên balkêş li welatên dagirkerên Kurdistanê jî rûdidin.

Berîya çend salan kê bawer dikir ku dagirkerên Kurdistanê li dijî cîhana demokratîk cîh bigrin û Kurd bibin dostê cîhana demokratîk? Berîya çend salan kê bawer dikir ku rûxandina desthilatdarîyên Sûrîye û Îranê di rojeva cîhana demokratîk de bi cîh bibe?

Kê bawer dikir ku Kurd li çaralîyên Kurdistanê û li welatên dagirkerên Kurdistanê ji bo bidestxistina mafên xwe yên neteweyî û ji bo cîbicîhkirina prosesa demokrasîyê serîhildin û piştgiriya cîhana demokratîk bigirin?
Tesîra berfirehbûn û rûdanên li Başurê Kurdistanê û prosesa demokratîzebûna Iraqê û muzakereyên endametîya Yekîtîya Ewrûpayê û cîhana demokratîk ya ku globalîzmê di rojeva cîhanê de bi cih dike, zorê didin Turkîyeyê ku xwe biguhere. Heke bi şeklî be jî dema ku Turkîye qalikê xwe diguhere, dergehên îmkanê û rêyên xebata bi metodên nûjen li Bakurê Kurdistanê li ber Kurdan vedibe.

Ma ne gunehkariyeke mezin e ku em di qonaxeke weha de bêdeng û bêhelwest bimînin?

Ma ne nehaqîyeke mezin e ku berxwedena çarenivîsa me, ji van tecrûbeyan bêpar bimîne?

Ma dem ne hatîye ye ku em êdî li xwe vegerin û li keda xwe bixwedî bin?

Bersiva hemi pirsan “BELÊ” ye.

Divê;
1 Em li dîroka xwe bixwedî bin û ji serpêhatîyên xwe dersan werbigirin.
2 Em êdî dev ji devokên kesayetî, grûbî, deverî, êl û olî berdin. Devokên tevkarîyê di qada xebat, tevger û tekoşîna neteweyî de bi kar bînin.

Ger îradeya hevbeş li Başurê Kurdistanê pêknehata û rêberîya kurdan nekiriba, gelo Kurd di qada neteweyî û navneteweyî de dikarîbûn bibana xwedîyê rûmeteke weha bilind?

Divê em bi hevre nerîn, daxwaz, hêrs, kîn, kariyer û berjewendîyên kesayetî, sîyaset û îdolojîyên kevnare bi pîvanên serdema me ji nû ve şîrove bikin û kêmasîyên xwe bibêjin, binivîsin da ku em bikaribin ji derfetên nû ders werbigirin. Li ser pêwîstîyan li hev bikin, vê prosesê bi awayekî berhemdar şîrove bikin û erk û watinîyên xwe tesbît bikin. Ancax em bi vî awayî dikarin, daxwaz û hêvîyên gelê xwe, mebesta hebûna xwe, berpirsiyarî û erkên xwe yên neteweyî, wîjdanî û şaristanî bînin ziman. Hewildanên bi vî rengî dikarin bibin xerc û alavên xebatên li pêşîya me yên ji bo avakirina alternatîfeke sîyasî li Bakurê Kurdistanê.

Ev hewildanên ku em behsa wan dikin rêya avakirina pêşnîyazên çareserîyê vedike û dibe sedemê ku em bibêjin: Alternatîfa me bi xebateke bi rastî, fedakarî û bi mêrxasî destavêtîna rojevê ye. Helbet ew jî li Bakurê Kurdistanê bi rêya îradeya hevbeş, avakirina partiyeke sîyasî ya bi nav û nasnameya xwe Kurd û Kurdistanî ye.Hedefa vê partîyê li ser axa xwe deshîlatdarbî. Pêwîste metodên demokratîk û eşkere bingehê xebata me ye. Divê ev xebat pirralî û berhema îradeya hevbeş ya kurdan be. Ev daxwaz, helwest û
hêvîyên me ji bo gelek kes û alîyan dibe kû îro weke xewnan li qelemê bê dayinn. Divê em ji bîr nekin ku gelek rûdan û berfirehbûnên ku me li jor rêzkirin, beriya çend salan xewn û xeyal bûn. Ev potansîyel û derfet li Bakurê welatê me heye. Lê îro, rêberîyeke ku hemî aliyên sîyasî rapêçe mixabin ava nebûye. Di vî warî de gelek hewildan hene. Lê dîsa sed mixabin, ji ber sebebê ku me li jor behs kir, ev hewildan hemî stuxwar û sêwî dimînin. Encamên van hewildanan qels û tengbîn in û bersiva daxwazên vê pêvajoyê nadin.

Îro dema me ji demên berê yên ku kurd ji bo tiştên hêç û pûç ji hev bidûr diketin cudatir e.
Divê tevgera Bakurê Kurdistanê bi şexsîyet xwedîhelwest be û serbixwebûna xwe biparêze. Rêxistina ku li Bakurê Kurdistanê bê avakirin; divê pêşeroja Miletê Kurd û statuya Kurdistanê neke bin tu îpotekên sîyasî.

Her weha tevgera li Bakurê Kurdistanê dive di hemi hewildan û çalakîyên xwe de ji desthilatdarîya li Başurê Kurdsistanê re ne be serbar. Di warê diplomasîya sîyasî de astengîyan peyda neke Başur di bin tometan de nehêle.

Avabûna alternatifeke weha dikare dagirkerên Bakurê Kurdistanê bi xwe bibilîne û bi vî awayî tîrêjên nîjaperestîya Turkiyeyê ji ser Başurê Kurdistanê kêmtir bike. Lewra bidesketinên li Başurê welatê me ji bo hemi kurdên welatperwer, bidestvehatinên pîroz in. Tovên azadîya hemi alîyên Kurdistanê ne û xewna her kurdekî dilsoz e. Her weha xwîna bi hezaran şehîdan di van bidesvehatinan de heye û berdewam e. Paraztin û bipêşdexistina van bidestvehatinan erkê ser şanê me teva ye.

Metodên afirandina rêxistineke bi nasname Kurd û Kurdîstanî li Bakurê Kurdistanê çi ne?

Li gora me:

Divê;

1 Desteyek kadirên lihevkirî, bi progremeke li hevkirî û bi desteyek kadirên nuhatî re gava yekem bavêjin.

2 Kadirên destpêke di qada sîyasî de ji gumanan parastî bin.
3 Xebata destpêkî, di danustandinên xwe de ambargoyên sîyasî daneynin ser tu grûp û kesayetîyên ji gumanan bidûr.
4 Di destpêkê de rê li ber mecal û rexneyan neyên girtin.
5 Xebata avakirina alternatîfê di rêzkirina daxwazên xwe de vekirî û zelal bin.

BİJÎ KURD Û KURDİSTAN

BİJÎ PÊŞMERGE

ÎNSÎYATÎFA PARTÎYA KURDİSTANÊ