Zordariya dewletan û mirovên kevneperest li ser Êzdiyan berdewam e!
Kemal Tolan



Wekî ji aliyê raya giştî ve jî têye dîtin, ji hingava wezareta karê derve ya Almanyayê di destpêka vê sala 2006 an de bîryarek li ser hêjmar û jiyana Êzdiyên di Tirkiyê de mane da û hêjî dibêje „neheqiya polîtîk ya tevayî li Tirkiyê rabûye Êzîdî, File, Asûrî û Ermenî dikarin vegerin ciyên xwe“, gelek mal anjî komelên me Êzdiyan(ya li bajarê Oldenburg, Celle, Leer, Bergen, Kalkar, Hannover, Nienburg, Berlin, Detmold, FKÊ- û hwd.) rêxistin, dezgeh, rojname, malper û televziyonen Alman, Tirk û Kurdan li ser vê bîryar û nêrîna ne rast rawestiyan û hêjî her yekê li goriya agehdarî û nêrîna xwe nûçe, agehdarî û şîrovên cûrbe cûr e diweşînin. Gelek ji van çalekî û weşanan hêja ne û hinekî rêya çareseriyê ronayî dikin.

Lê, li goriya dîtina min gelek rêxistin û dezgehên me Kurdan ji vê pirsgirêka Êzdiyan re xwedî dernakevin û alîkariyê nadine me. Heta hinek ji Kurdan jî vê mijarê tevî hevûdinê dikin û dibêjin “pirsgirêka azadiya olan jî bi pirsgirêkên siyasî ve girêdayine û heta mafê siyasiya Kurdan neyê naskirin, ev pirsgirêkên Êzdiyan jî nayêne pejirandin“. Ji xwe divê em Kurd jî baş bizanibin heta destkuj, xwarin û vexwarinên Êzdiyan di nava Kurdîstanê de heram bin,………… Êzdî jî nikarin vegerine ser axa bav-kalên xwe û ji azadiya „mafê siyasiya Kurdan“ jî fêde bikin.

Her weha dema ez bala xwe didime hinek çalekiyên berpirsyarên rêxistin, malper, mal û komelên me Êzdiyan jî dirênim, dilê min hîna zêdetir diêşe. Û dibêjim şûna ku ev berpirsyarên rêxistin, mal û komelên me Êzdiyan bihevûdinê re çareseriyekê ji vê pirsgirêka me ye gelekî mezin û sereke re bivînin, ew radibin dîsa ji hevûdinê pir cûde û her yekê tenê berjivendiyên xwe didine pêş.

Ji xwe berpirsyarên dewleta Alman û dagirkerên welatê me jî vê bêtifaqî û qelsîtiya me baş dizanin û dibînin ku gelek ji me hêjî bi mejuyê muxtarî û axatiya gundan dijîn. Û lewmajî ew naxwazin girîngiyê bidine pisgirêkên me ye netewî, civakî û mafên meyî jiyanê nasbikin.

Bi dîtina min, gava berpirsyarên rêxistin, mal û komelên me Êzdiyan, rêxistin û dezgehên Kurdan jî karibin bi navê tifaqeke rast van serpêkhatî, agehdarî , delîlên rewş û jiyana me di qada navnetewî de şîrove û diyarî bikin, hingê berpirsyarên wezareta karê derve ya Almanyayê û hemû hevalbendên xwe jî mecbûr bivin û bêjin, belê raste ji hingava ku berandametiya tirkiyê ji bo yekîtiya avrupa yê hatiye pejrandin û heta vêga hêjî tû aremî neketiye nava tirkiyê, zordariya dewletê û misilmanên kevneperest li ser Êzîdiyan hîna berdewam dike.

Ji bo ku em bigihîjine vê encama weke min gotî, pêwîste em Êzdî hêjî zêdetir xwe nasbikin û bizanibin, heta ev kesên ku ji nava civaka me dûr ketî û nikarin hêja gemara li devê derê xwe paqijkin û hercar berjivendiyên xwe tenê didine pêş berpirsyarên rêxistin, mal û komelên me Êzdiyan bin, tû rêxistin û kesayetên dilxwazên doza me Kurdên resen jî nikarin alîkariyê bi me û civata rihaniyên me re bikin. Ev zordariya dewletên dagirker û miletên kevneperest jî wê li ser me her berdewam be.

Dawîyê de ez jî wek bav û kalên me Êzdiyan dibêjim,“hawên Xwedê û Tawisî-Melek gelekin“ û hêvîdarim ku ew li pişta me bin !