Bakur

Besam Mistefa

* Bo: Selîm Berekat 

Gir û deştên te

Hîn li wir in ..

Toza mîr û

Heriya jîr

 Hîn li wir in ..

Hêsirên xwînê

Bêgunehiya gunehiyê

Berfa henûniyê û

Henûniya xemgîniyê hîn li wir in ..

Qeşmerokên ku bobelatê diserdînin û

Xwêdana hêrsa te ...

Hîn li wir in ...

Kenên girî

Şêrîniyên tehl

Rasthatinên xwar û

Bêzariyên zar

Tev li wir in ..!

Êêêêêêêêêêêêê......

Çolistana bi tîpên te avis

Hîn li wir e .

Zeharên xwe yên çav zer ji

Rojekê re vedişêre!

Dehl û zevî

Bi destên ti Xwedayan

Nehatine çandin

- Ew erdeke ber bi cot e –

....Û gur û wawîk

Gezan li laşê girê te yê

"Mozan " didin

Hinde ku

Xwîn ji laşê te

Diherike

Û ji çavên  te tîp dibarin

Mîna baranê dibarin

Û  hey dibarin ...

Û zarokên Bakur

Pêxwas

Di kolanên dilê te de

Dilê ewran tev didin :

     Ya rebî baran were

     Genimê çûkan şîn were ...

**

Tu tiştekî naxwazî!

Tenê,

     Ev biyaban şîn bibûna ..

     Ev birîn ji bîr bibûna ..

     Ev êş dîl bibûna ..

     Pişkulên reş ber warê xwe ve vegeriyana ..

     Zemîn, zemîn bana û

     Mêjû, ev dêlika bêbav, ji xew û kawikiya xwe rabûbana!

Tu tiştekî naxwazî!

Lê li serûbinê bakur

Zanim, te dav û xefik vedane ..

**

Bibhîze:

Va ye zarokên xewnê

Koysenceq berbi cihê te ve,

Dixindirînin ---- mîna ku xarek be!

Va ye berf ji serma dikele

Va  ye xefikên te

Çirûskan didin

Xezeba xwe / te kom dikin û

Lingan gez dikin ..    ....

     Ev e şev li cankêşê ye

     Ev e roj xwe li ba dike

     Manendî bûkekê xwe

     Kar û bar dike .............

     Va ye dawî.. dawî ..dawî

     Bakur

      Zan dibe ...

...Û tanî roja ku tu gerdûn

-Mîna ku tekerê

Piskilêtekî xirabûyî be

Li pêşiya xwe biajonî .................

     Roj baş !

     Temen baş !

      Jiyan baş !