|
Kurdistaniyên hêja!
Neyarên Kurdan bi kiryara terorîstî,
bi komkujiyê di roja 14.08.2007an de
dîsa şîn xistine mala Kurdan, nêzîkî
600 însanên bê sûc û guneh qetil
kirin. Hedefa dijminan vê carê jî
Kurdên Êzîdî bûn. Hingiya şer li
Iraqê heye ji bilî bûyereke li
Bexdayê ku hezar şiî ji tirsa
terorîstan li ser pirê hevdû
pelixandin tevkujiyeke bi vî şiklî
nehatiye pêkanîn. Bi rastî aqilê
mirovan disekine, hestiyên mirovan
dilerizin ku çawa ev nemirovana
dikarin di nava çend xulekan de
ewqas canan ji holê rabikin.
Lê divêt ev pirsa jî bêye kirin ku
çawa dibe hukumeta Kurdistanê li
devera Şengalê ewqas bê tedbîre ku
dijmin dixwe de wî mafî dibîne ewqas
mirovên me şehîd bike.
Herkes dizane ku Iraq di nava gola
xwînê de ye, lê rewş li Kurdistana
azad ji deverên din cida ye û
hukumeta Kurdistanê her dem bi maf
behsa aramiya Kurdistanê dike.
Kurdistana azad mecbûre tedbîrên
leşkerî li herêmên ku ne di bin
kontirola wê de ne jî bigire, xelkê
xwe biparêze û bersiveke wisa bi çi
şiklî dibe bila bibe bide dijminan
ku ew jî ji rewşa niha zerarê
bibînin ku bila nebêjin zarokên
Kurdan çi êzîdî, çi misliman û çi jî
yên din qurbaniyên wanin û ew
dikarin her gav wan ji holê ra bikin.
Heger hukumeta Kurdistanê bersiva vê
bûyera nemirovane nede, dê baweriya
xwe li hemberî xelkê Kurdistanê li
her çar perçên Kurdistanê wenda bike.
Nabe ku xelk were li welatê min, li
ser axa min, li mala min destê xwe
li ba bike û bi sedan zarok, jin,
kal û pîrên min qirbike û ez jî bi
daxuyaniyan bibêjim, wele ezê di
salê de carekî wan bibîr bînim û
yadîgariyeke sembolîk çê bikim û
bila xelkê min jî pê ker bibe.
Bê guman armanc ne ew e ku hukumeta
Kurdistanê sûcdar bikim, lê waye
rewş li meydanê ye, hukumeta
Kurdistanê jî mecbûre li gorî wê
rewşê tevbigere. Heger bûyereke wisa
li Ewropa an jî li dereke din çêbibe,
xelk hêsabê ji hukumetê jî dixweze
ku çima di dema xwe de tedbîr
nehatin girtin û li ser bûyerên wiha
serokwezîr û wezîr mecbûr dikin ku
îstifa bikin û di dewsa wan de kesên
ji wan jîrtir werin ser desthilatiyê.
Ez hêvîdarim ku hukumeta Kurdistanê
di demeke kin de dilê xelkê xwe şa
bike û ji dil de li heyiyên xwe çi
ol, çi jî heyîyên dîrokî derkeve ku
tofaneke din neyê serê wan. Ez bi
tund û nefret vê bûyera ne mirovane
li Şengalê şermezar dikim û di serî
de ji Kurdên Êzîdî û ji xelkê
Kurdistanê re serxweşiyê dixwezim.
fuadsipan@yahoo.de
Almanya, 20.08.2007 |
