|
Husên Hebeş
Wergerandin ji Erebî: Cankurd
Çemê lawaz, çemê livnaz
û gelek bi zexim...
Çemê ku ewan bi fîrdewsan dixapandin
û bi behiştên Eden ên di bin re
kulîlkên berbang û rizgariyê diherikin,
Keleka hêminiyê, ku ewan dibirin aliyê dî,
digihandin "Olimpa" azadiyê, bêhêvî hişt...
.. Û ewan di çavlêdanekê de avêtin ser rêya têkçûnê
biyanî,
lêdaçûyî
diranên masiyên birçî govdeyên wan ên westiyayî ji ber hev direvînin
û hêlehêla xwişîna avê...
bê ku li xwe hişyar bibin
û bê ku çavên xwe bi wan fîrdewsan kil bidin,
û bi wan behiştên, ku di bin wan re
kulîlk û berbang diherikin.
Di wê serpêhatiyê de
Nekanîn nûçeyekê an rêçekê li şûn xwe bihêlin,
Tenê li şûn xwe bermayên rojek xwînî
di şewlerê çemê pir bi zexim de hiştin,
çemê sêdarê, roja rabûn û dojehê,
çemê Êvros...
Zivistana 1996
|
