Kiryarên antidemokrat yên rejîma Şamê li dijî gelên Sûriyê didomin. Siyaseta inkarê ya li himberî kurdan her wek xwe maye. Rejîm bi vê siyasetê re jî, zextên xwe li ser hêzên demokrat ên ereb xurt dike û her kesê ku xwe dilivîne û doza demokrasî û mafên mirovan dike, dide dadgehê û davêje zindanê.

Li gorî agahiyên dawî rejîma sitimkar a Şamê dixwaze 150 malbatên ereb bîne Dêrika Hemko û di ered û zeviyên kurdan de bi cih û war bike. Komela mafên mirovan li Rojavayê Kurdistanê DAD di daxuyaniyekê de diyar kir, ku hêzên ewlekariyê biryara anîna 150 malbatên ereb ji bajarokê Şedadê (100 km li başûrê Hessekê dikeve) ji bo wan di erdê kurdan de bi cih bike, daye.

Ev malbat dê li gundê Xerab Reşikê bên bi cih kirin û 3500 donim eredê gund dê li wan bê par kirin. Ev gav wek berdewamiya siyaseta erebkirina heremên Rojavayê Kurdistanê ye. Di dala 1970 î jî de rejîmê 45 gund di herêma Cezîrê li erebên Reqayê belav kiribû û bi hezaran donim erdê kurdan yê herî berhemdar dabû wan. Niha ji kurdan tê xwestin ku li dijî vê gavê derkevin û bi tu awayî destûrê nedin van kesan ku li herema kurdan bi cih bibin.

Ji aliyê din rejîma dektator Beşar Essed 7 kesên muxalif dan dadgehê û bi giştî 39 sal li wan birî. Her yek ji wan 7 sal, tenê ji ber ku gotarên hin nivîskarên sûriyê yên li derveyî welat çap kiribûn û li hevalên xwe par kiribûn. Ew kes bi tewana "li dij welat kar dikin" hatin darizandin.

Rejîma Şamê ji bo berjewendiyên xwe biparêze hemû pîvanên hiqûqî bin pê kiriye. Li hundrê welat kesên muxalif digire û eşkence dike û bi dehên salan wan davêje zindanê. Li derveyî welat jî destê xwe dirêjî dijberên xwe dike û wan yeko yek tesfiye dike. Yê herî dawî jî endamê perlemana Lobnanê Welîd Îdo bû. Ew kes yek ji dijberên rejîma Essed li Lobnanê bû û endamekî çalak yê kutleya Herîrî bû. Niha rejîma Şamê bi riya terorkirina endamên vê kutleyê dixwaze hijmara perlemanterên wê kêm bike da ku hikûmet têk here. Ji xwe dema hikûmet têk here, dê hêzên muxalefet rabin ser piyan. Ev jî hemû hevalbendên Essed in. Hizbulah û tevgera Emel û Genral Ewin …hwd.

Desttêwerdanên rejîma Essed li Lobnanê û Filistînê weha zêde û tirsnak bûne, ku istiqrara herêmê dixe tahlûkeyê de.

Bi lempa kesk ya Şamê Xalid Maşel Serokê Tevgera Hemasê biryara derbeya li dijî El Fathê da. Maşel yê ku li Şamê mêvanê Essd e û 250 milyon dolar ji Iranê wergirtibû, ji bo bi cihanîna her biryara Şam û Tehranê amede ye. Ji ber hindê dê herêm hêdî hêdî ber bi kaos û şerê navxweyê ve here. Ji xwe berê jî Essed gotibû, eger min bidin dadgeha navnetewî ya ji bo darizandina kujêrên Herîrî, "Ez ê agir bera herêma di navbera deriya sipî û ya reş de, bidim"!!



tariqhemo@hotmail.com